Baby Bag

„არასოდეს ჩემს ცხოვრებაში არ დამიძალებია ბავშვებისთვის საკვები… სულ მინდა, რომ ყველა კმაყოფილი იყოს,“ - როგორია ოთხი შვილის დედის, თაკო ტაბატაძის საოჯახო რუტინა

„არასოდეს ჩემს ცხოვრებაში არ დამიძალებია ბავშვებისთვის საკვები… სულ მინდა, რომ ყველა კმაყოფილი იყოს,“ - როგორია ოთხი შვილის დედის, თაკო ტაბატაძის საოჯახო რუტინა

ოთხი შვილის დედა, მსახიობი თაკო ტაბატაძე საოჯახო რუტინისა და ბავშვების კვების რაციონის შესახებ საუბრობს. მისი თქმით, თითოეულ ბავშვს საკვებს ინდივიდუალურად უმზადებს, რათა ყველა კმაყოფილი დარჩეს:

„გაგიზიარებთ ჩემს საოჯახო ფუსფუსსა და დილას. სახლში ბევრი ბავშვია და სულ მინდა, რომ ყველა კმაყოფილი იყოს. ოთხ ბავშვს რომ ერთი საკვები მოუმზადო და კმაყოფილი იყოს ოთხივე, ძალიან უცნაური იქნება. არასოდეს ჩემს ცხოვრებაში არ დამიძალებია ბავშვებისთვის საკვები. ვცდილობ ხოლმე, რომ რაღაც ალტერნატივა შევთავაზო. ხშირად არის ამაზე საუბარი, რომ ჭარბი წონისკენ მიდრეკილება ხშირად თურმე ბავშვობაში დაძალებით იწყება.“

თაკო ტაბატაძის თქმით, ბავშვების რაციონში უპირატესობა ხილს, ბოსტნეულს და ხორცს ენიჭება:

„უპირატესობას ვანიჭებთ ხილს, ბოსტნეულს, ხორციც არის ჩვენს რაციონში, მაგრამ ეს უკვე შუადღეს და საღამოს. დილით ყოველთვის ვიწყებთ შვრიის ფაფით, თუ უარს არ მეტყვიან გოგონები. გვაქვს ალტერნატივა წიწიბურა. შვრიის ფაფა რომ არ მოგვბეზრდეს, ვამდიდრებთ სხვადასხვა ინგრედიენტებით. კვებას და კვებას შორის, როდესაც ბავშვს მოშივდება და წახემსების სურვილი აქვს, ნახშირწყლებს და ცომეულს რომ არ მიეძალოს, მაგიდაზე სულ არის ხილი და ბოსტნეული. ჩემი და ჩემი მეგობრის აღმოჩენაა, რომ თურმე სულგუნს საოცრად უხდება ბროწეულის სოუსი. ბავშვებიც დიდი სიამოვნებით მიირთმევენ. ეს არის ჩემი დესერტი, რომელიც არის უგემრიელესი. კარგია, თუ დავამატებთ ნუშს, ცოტა მზესუმზირაც ძალიან უხდება. ნინის რაციონია ავოკადო და კვერცხი. ავოკადო მოვიგონეთ, იმიტომ, რომ რაღაც პერიოდი ჰქონდა, რომ არ მიირთმევდა დიდად საჭმელს. ძალიან ვეცადეთ, რომ რაღაც მოგვეფიქრებინა, რომელიც მოეწონებოდა. გავსინჯეთ ავოკადო, რომელიც ძალიან მოეწონა ჩვენს ძვირფას ნინის. ბავშვებს უყვართ საუზმის მომზადებაში მოხმარება. ეს სიფერადე ჩემი მარკეტინგული ხრიკია.“

„ძალიან ხშირად ვსეირნობთ, იმიტომ, რომ პატარებისთვის აუცილებელია სუფთა ჰაერი. მიუხედავად იმისა ქარია, ცივა თუ წვიმს, მაინც ვსეირნობთ. გუბეებში გვიყვარს ძალიან ხტუნვა. ოთხი შვილი, ამათი აქტივობებზე წაყვანა-წამოყვანა საუკეთესო ვარჯიშია. ძალიან უყვართ ცეკვა. კონცერტიც კი გვქონდა ერთად მე და ჩემს გოგონებს,“ - აღნიშნულ საკითხზე თაკო ტაბატაძემ ტელეკომპანია „რუსთავი 2“-ის გადაცემაში „დილა მშვიდობისა საქართველო“ ისაუბრა.

წყარო: ​„დილა მშვიდობისა საქართველო“

შეიძლება დაინტერესდეთ

რამდენად მნიშვნელოვანია წყლის დიდი რაოდენობით მიღება ვენური პრობლემების არსებობის შემთხვევაში? - სისხლძარღვთა ქირურგი ზაზა ლაზარაშვილი

რამდენად მნიშვნელოვანია წყლის დიდი რაოდენობით მიღება ვენური პრობლემების არსებობის შემთხვევაში? - სისხლძარღვთა ქირურგი ზაზა ლაზარაშვილი

სისხლძარღვთა ქირურგმა ზაზა ლაზარაშვილმა ვენური პრობლემების არსებობის შემთხვევაში წყლის ადეკატური მიღების მნიშვნელობაზე ისაუბრა:

„ზოგადად წყლის მიღება მინიმუმ ორი ლიტრის ოდენობით დღე-ღამეში უმნიშვნელოვანესია სხვადასხვა დაავადების პროფილაქტიკისა და ნორმალური ყოფისთვის. სითხის მიღებას სისხლის მიმოქცევისთვის განსაკუთრებული მნიშვნელობა აქვს. სისხლის სითხოვანი ნაწილი გაჯერებული უნდა იყოს. სიბლანტე არ უნდა იყოს მაღალი, რადგან მის გადადინებას ვენურ სისტემაში ქვემო კიდურებიდან გულის მიმართულებით გარკვეული პრობლემები ექმნება.“

„თუ პაციენტი არ იღებდა სითხეს და დაიწყო მისი ადეკვატური მიღება, რა თქმა უნდა, ის მაშინვე იგრძნობდა დადებით მხარეს. თუ სიმპტომები ალაგდა სითხის მიღების გამო, ე.ი. მას გარკვეული სახით ჰქონდა ქრონიკული ვენური დაავადება იმ სტადიაში, როდესაც მისი მოგვარება ცხოვრების სტილის შეცვლით არის შესაძლებელი და მედიკამენტური საშუალებების გამოყენება ჯერ არ არის საჭირო. რა თქმა უნდა, სითხის მიღება არის უმნიშვნელოვანესი. ორგანიზმი უნდა იყოს გაჯერებული წყლით,“- აღნიშნულ საკითხზე ზაზა ლაზარაშვილმა საქართველოს პირველი არხის გადაცემაში „პირადი ექიმი - მარი მალაზონია“ ისაუბრა.

წყარო:​ „პირადი ექიმი - მარი მალაზონია“

წაიკითხეთ სრულად