Baby Bag

გაიცანით 13 წლის მათემატიკის მასწავლებელი ბიჭი, რომელიც პატარა მოსწავლეებს ცოდნის შეძენაში ეხმარება

გაიცანით 13 წლის მათემატიკის მასწავლებელი ბიჭი, რომელიც პატარა მოსწავლეებს ცოდნის შეძენაში ეხმარება

13 წლის დაჩი საზანდრიშვილი თანატოლებს მათემატიკას ასწავლის და იმ მოსწავლეებს, რომლებსაც ძვირადღირებულ რეპეტიტორებთან სიარულის შესაძლებლობა არ აქვთ, ამ ფორმით ეხმარება. მისი თქმით, მას კარგად აქვს გააზრებული პასუხისმგებლობა, რომელიც საკუთარ თავზე აიღო:

„ვიაზრებ იმ პასუხისმგებლობას, რაც ჩემს თავზე ავიღე. ყველანაირად ვეცდები იმ მშობლის იმედი გავამართლო, ვინც მენდობა. მკაცრი მასწავლებელი მარტო ჩემი თავის მიმართ ვიქნები. რაღაც რომ არ აინტერესებს ბავშვს, ნაწილობრივ მასწავლებლის ბრალიც არის. ჩემი ახსნილი და მასწავლებლის ახსნილი შეიძლება ერთნაირად გაიგოს. ჩემთან ბავშვს უფრო გაუმარტივდება მუშაობა, იმიტომ, რომ სხვაობა ასაკში იქნება 1-2 წელი. ჩვენ გვექნება საერთო ინტერესები, რითიც ერთმანეთთან უკეთესი კომუნიკაცია და გაგება შეგვეძლება.“

დაჩი აღნიშნავს, რომ ადამიანს მათემატიკა მთელი ცხოვრების მანძილზე სჭირდება:

„ჩემთვის მათემატიკა როგორც საგანი არ არის. ის არის რაღაც, რაც მთელი ცხოვრება დაგჭირდება. მას შეუძლია ადამიანის აზროვნება გააფართოვოს. ნებისმიერ საქმეში, რასაც ადამიანი ცხოვრებაში აპირებს, მცირე დოზით მაინც მათემატიკა ყველგან საჭიროა.“

„მასწავლებლის როლი არაერთხელ მომირგია. ჩემს მეგობრებსაც, როდესაც რაღაც გაუჭირდებოდათ, ვეხმარებოდი. აღმოვაჩინე, რომ მაქვს კარგი ახსნის უნარი და მინდა, ეს უნარი გამოვიყენო. ყველა ბავშვს არ აქვს იმის საშუალება, რომ რეპეტიტორებთან და ძვირიან მასწავლებლებთან იაროს, მათთვისაც შეღავათი იქნება. მინდა, ასეთ ბავშვებს დავეხმარო,“- აღნიშნულ საკითხზე დაჩი საზანდრიშვილმა ტელეკომპანია „რუსთავი 2“-ის გადაცემაში „დილა მშვიდობისა საქართველო“ ისაუბრა.

მასწავლებლობის დაწყების სურვილი დაჩიმ სოციალურ ქსელში გამოხატა, სადაც შემდეგი შინაარსის პოსტი გამოაქვეყნა:

„მოგესალმებით ყველას, მე დაჩი ვარ და ვარ 13 წლის.

ვსწავლობ გაძლიერებულ მათემატიკას 4 წელია კომაროვში და კომაროვის პედაგოგებთან.

მოვამზადებ II, III, IV, V კლასის ბავშვებს სკოლის მათემატიკაში და დავეხმარები მათ გაკვეთილების მომზადებაში და საკითხების კარგად გაგებაში.

გამიხარდება თუ ვინმეს გექნებათ სურვილი შვილები ჩემთან მოამზადოთ. ძალიან მინდა და მჭირდება მუშაობა და ეს პირველი მცდელობა და ნაბიჯია ჩემი მომავალი გეგმების მისაღწევად.

ვფიქრობ რომ მაქვს კარგად ახსნის უნარი და არ მეზარება, რაც მთავარია.“

დაჩის განცხადებას ბევრი დადებითი გამოხმაურება მოჰყვა.

წყარო:​ „დილა მშვიდობისა საქართველო“


შეიძლება დაინტერესდეთ

„D-დიმერი როდესაც იმატებს ორგანიზმში, ეს ნიშნავს, რომ სადღაც მოხდა თრომბის წარმოქმნა,“ - თერაპევტი ბეჟან ხელიძე

„D-დიმერი როდესაც იმატებს ორგანიზმში, ეს ნიშნავს, რომ სადღაც მოხდა თრომბის წარმოქმნა,“ - თერაპევტი ბეჟან ხელიძე

​​თერაპევტი ბეჟან ხელიძე საქართველოს პირველი არხის გადაცემაში „პირადი ექიმი - მარი მალაზონია“ D-დიმერის ანალიზის მნიშვნელობაზე საუბრობს და აღნიშნავს, რომ ის თრომბის განვითარების საფრთხეების შესაფასებლად გამოიყენება:

„პირველ რიგში, რაც შეეხება D-დიმერს, მოკლედ რომ ვთქვათ, ​D-დიმერი არის თრომბის დაშლის პროდუქტი. D-დიმერი როდესაც იმატებს ორგანიზმში, ეს ნიშნავს, რომ სადღაც მოხდა თრომბის წარმოქმნა. ეს ძირითადად 99%-ში ხდება ღრმა ვენებში, ანუ ფეხებში, რასაც ხელს უწყობს უძრაობა. საქართველოში ისედაც ძალიან დიდი პოპულაციაა, რომელსაც აწუხებს ღრმა ვენების თრომბოზი. ამ ადამიანებს ისედაც აქვთ D-დიმერი მომატებული.“

ბეჟან ხელიძის თქმით, კლინიკაში შეყვანილ ყველა პაციენტს უმოწმდება D-დიმერის მაჩვენებელი, აღნიშნული ანალიზი კი რამდენჯერმე ტარდება გამეორებით:

„კლინიკაში ვინც შემოდის, ყველა პაციენტს უკეთდება D-დიმერი. ​ეს ანალიზი გარკვეული ინტერვალით მეორდება და ყოველ სამ დღეში ტარდება. თუ ადამიანს აქვს მაღალი D-დიმერი და ღრმა ვენების თრომბოზი, მაშინ ეს გამოწვეულია სწორედ ღრმა ვენების თრომბოზით და არა კორონავირუსით.“

„რაც შეეხება D-დიმერს, თუ რაში ვიყენებთ მას ექიმები, ჩვენ მას ვიყენებთ რისკის შესაფასებლად, რომ შემდეგ სათანადო ანტიკოაგულაციური მკურნალობა დავნიშნოთ. პაციენტისთვის ეს არ უნდა იყოს შემაშინებელი. საქართველოში ნათლად გამოჩნდა, რომ პრობლემას ქმნის ჭარბი წონა. ჭარბ წონას ისედაც თან სდევს უძრაობა, შესაბამისად, ადამიანები ისედაც რისკის ქვეშ არიან, რომ ​ღრმა ვენების თრომბოზი განვითარდეს და D-დიმერი მაღალი ჰქონდეთ. პრობლემურია არტერიული ჰიპერტენზია და დიაბეტი. ეს ჯგუფი არის პაციენტების, რომელიც არის საყურადღებო,“ - აღნიშნავს ბეჟან ხელიძე.

წყარო: ​პირადი ექიმი - მარი მალაზონია

წაიკითხეთ სრულად