ახალ წელს საყვარელ ადამიანთან ერთად თუ ატარებთ და რომანტიკული განწყობის შექმნა გჭირდებათ, ჩვენს სტატიას ყურადღებით გაეცანით. დღესასწაული დაუვიწყარი რომ გახდეს, საინტერესო, ორიგინალური და პოზიტიური იდეები გჭირდებათ, რომელთაგან თქვენთვის ყველაზე მოსაწონს შეარჩევთ. შესაძლოა, თქვენ ღამის 12 საათზე რომანტიკული კოცნის იდეით მოიხიბლოთ ან თეფშების დამსხვრევის არაორდინალურმა ტრადიციამ მიგიზიდოთ. ყველაფერი თქვენს პირად არჩევანსა და გემოვნებაზეა დამოკიდებული.

1. რომანტიკული კოცნა ღამის 12 საათზე

აღნიშნული ტრადიცია საკმაოდ ძველია, თუმცა ის აქტუალობას თანამედროვე წყვილებშიც არ კარგავს. შეყვარებული ადამიანები 12 საათს რომანტიკულად იშვიათად ხვდებიან. არ აქვს მნიშვნელობა რა საქმით ხართ დაკავებული ახალი წლის დადგომისას, დაივიწყეთ ყველაფერი, რასაც აკეთებთ და საყვარელ ადამიანს რომანტიკული კოცნა აჩუქეთ. აღნიშნული ტრადიციის მიმდევრებს ღრმად სწამთ, რომ თუ 12 საათს რომანტიკული კოცნით შეხვდებით, მთელი წელი სიყვარულით სავსე გექნებათ, თქვენი გრძნობა კი უფრო და უფრო გაძლიერდება. არ აქვს მნიშვნელობა, ცრურწმენების გჯერათ თუ არა. 12 საათის დადგომისას თქვენი პარტნიორი მოიტაცეთ და დაუვიწყარი კოცნით მოაჯადოვეთ.

2. ცეკვა ტრადიციული საახალწლო სიმღერის თანხლებით

შოტლანდიელი პოეტის რობერტ ბერნსის ლექსის „Auld Lang Syne“-ს ტექსტზე დაწერილ საახალწლო სიმღერას ღამის 12 საათზე მსოფლიოს სხვადასხვა კუთხეში აქტიურად ასრულებენ. აღნიშნული ტრადიციული სიმღერის ფონზე საყვარელ ადამიანთან ერთად იცეკვეთ, რა თქმა უნდა, ეს ყოველივე რომანტიკული კოცნის შემდეგ უნდა მოხდეს.

3. უცნობი კერძის დაგემოვნება

სამზარეულოში ფუსფუსი თუ გიყვართ, ახალ წელს ექსპერიმენტი მოაწყვეთ. ეცადეთ, ისეთი კერძი მოამზადოთ, რომელიც აქამდე არასდროს გაგისინჯავთ. თქვენთვის ყველაზე მომხიბლავი სამზარეულო შეარჩიეთ, მაგ. ინდური და საყვარელ ადამიანთან ერთად იმზარეულეთ. აღნიშნული ტრადიციის მთავარი ხიბლი არა ახალი გემოების აღმოჩენაში, არამედ ერთობლივ ფუსფუსსა და თანადგომაშია. კრეატიულობა გამოიყენეთ და ეცადეთ, ისეთი კერძი მოამზადოთ, რომელზეც ყოველთვის ოცნებობდით, თუმცა გამბედაობა არ გყოფნიდათ, რომ მოგემზადებინათ. თუ თქვენს პარტნიორთან ერთად მომზადებული კერძი მოგეწონებათ, ტრადიცია მთელი წლის მანძილზე შეინარჩუნეთ.

4. ყუთში შენახული მოგონებები

ალბათ, გსმენიათ, რომ ზოგიერთი წყვილი საუკეთესო მოგონებებთან დაკავშირებულ ნივთებს, აქსესუარებსა და ჩანაწერებს ყუთში ათავსებს, შემდეგ კი მიწაში მარხავს. მომდევნო წელს ძველ ყუთს მიწიდან იღებენ, მის ნაცვლად კი ახალს მარხავენ. ძველი ყუთის დათვალიერება სასიამოვნო მოვლენების გახსენებაში დაგეხმარებათ. თუ რომანტიკული ადამიანი ხართ, აღნიშნული ტრადიციით ნამდვილად მოიხიბლებით. ღამის 12 საათზე საყვარელ ადამიანთან ერთად საუკეთესო მოგონებებით დახუნძლული ყუთი მიწაში ჩამარხეთ, მომდევნო წელს კი ამოთხარეთ და დაათვალიერეთ. აღნიშნული რიტუალი შეგიძლიათ, ყოველწლიურად შეასრულოთ.

5. შეხვდით ახალ წელს საყვარელ რესტორანში

იმის ნაცვლად, რომ ახალ წელს მეგობრებთან ერთად ხმაურიან წვეულებაზე შეხვდეთ, რესტორანში მაგიდა დაჯავშნეთ. უმჯობესია, თუ დღესასწაულს მხოლოდ საყვარელი ადამიანის გვერდით გაატარებთ. რომანტიკული თავგადასავლის მოწყობა თქვენს სადღესასწაულო განწყობას მნიშვნელოვნად აამაღლებს. საყვარელ ადამიანთან ერთად გატარებული ახალი წელი არასდროს დაგავიწყდებათ.

6. უნიკალური ღვინო

ახალ წელს საყვარელ ადამიანთან ერთად ისეთი ღვინო ან შამპანური უნდა მიირთვათ, რომელსაც სიმბოლური დატვირთვა ექნება. ეცადეთ, ისეთი ალკოჰოლური სასმელი შეიძინოთ, რომელიც თქვენი ქორწინების წელს არის ჩამოსხმული ან იმ მხარეშია დამზადებული, რომელთანაც ორივეს რომანტიკული მოგონებები გაკავშირებთ.

7. ხანმოკლე საახალწლო შვებულება

წყვილებს ყველაზე მეტად მოგზაურობა და ახალი საინტერესო ადგილების აღმოჩენა ხიბლავთ. თუ ახალი წლის სასიამოვნოდ გატარება გსურთ, ხანმოკლე შვებულების მოწყობა იდეალური გადაწყვეტილებაა. აუცილებელი სულაც არ არის, რომ მოგზაურობაში დიდი თანხები დახარჯოთ. თუ მატერიალური მდგომარეობა ხანგრძლივი ერთობლივი შვებულების გატარების საშუალებას არ გაძლევთ, ქალაქიდან ერთი ღამით გაიპარეთ. ახლომდებარე კურორტზე სასტუმროს ნომერი ან აპარტამენტი დაიქირავეთ. თუ საშუალება გაქვთ, შეგიძლიათ, ერთი კვირით სადმე გაემგზავროთ და შვებულება სასიამოვნოდ გაატაროთ. აღნიშნული ტრადიცია რომანტიკულ წყვილებს ყველაზე მეტად ხიბლავთ.

8. ყურძნის მარცვლების მირთმევა

ესპანეთში ღამის 12 საათზე ყურძნის თორმეტ მარცვალს მიირთმევენ, რათა მომავალი წლის თითოეული თვე იღბლიანი და ბედნიერების მომტანი აღმოჩნდეს. თუ ბუხარი გაქვთ, ცეცხლი დაანთეთ, ღვინო მოიმარაგეთ, ყველი და ყურძნის მარცვლები ლანგარზე დააწყვეთ და გემრიელად მიირთვით.

9. ყინულზე ციგურაობა

ყინულზე ერთად ციგურაობა წყვილებს ძალიან უყვართ. ახალი წლის ღამეს საციგურაოდ წადით. როდესაც მხიარულება დასრულდება, ცხელი შოკოლადი დალიეთ და მომავლის გეგმებზე ისაუბრეთ. შესაძლოა, გამოცდილი მოციგურავე არ ხართ და ყინულზე ფეხიც დაგიცდეთ, მაგრამ ნურაფრის შეგეშინდებათ, საყვარელი ადამიანი დაცემისგან დაგიცავთ.

10. თეფშების დამტვრევა

მხიარულება და სიცილი ახალი წლის განუყოფელი ნაწილია. დანიელ ხალხს მიბაძეთ და მათი საახალწლო ტრადიცია ერთი ღამით მოიპარეთ. 12 საათის დადგომისთანავე ხელში თეფშები მოიმარჯვეთ და ერთად დაამსხვრიეთ. აღნიშნული ტრადიციის მიმდევრებს სწამთ, რომ მომავალი წელი მათთვის ძალიან იღბლიანი იქნება.

11. პირველი პაემანი

ახალ წელს თქვენი პირველი პაემანი ზედმიწევნით გაამეორეთ. დარწმუნებული უნდა იყოთ, რომ ახალი წლის ღამეს მუხლები ძველებურად აგიკანკალდებათ და მუცელში პეპლების ფარფატსაც იგრძნობთ.

12. ერთობლივი მიზნების დასახვა

ახალ წელს ახალი მიზნებით უნდა შეხვდეთ. თქვენს საყვარელ ადამიანთან ერთად მომავლის გეგმები დასახეთ. ერთმანეთს თანადგომა და მხარდაჭერა აღუთქვით. ახალი წლის ღამეს აუცილებლად უნდა იგრძნოთ, რომ ერთი გუნდი ხართ და ყველა მიზნისთვის ერთობლივად იბრძვით.

13. ფილმის ყურება

საყვარელ ადამიანთან ერთად საახალწლო ფილმებს ჩაუჯექით. ორივე სადღესასწაულო პიჟამაში გამოეწყვეთ და სასიამოვნო ფილმების ყურებით დატკბით. შეგიძლიათ რომატიკულ კომედიებს მიანიჭოთ უპირატესობა, მაგ. „ბრიჯიტ ჯონსის დღიურებს.“

14. ერთობლივი ქველმოქმედება

ახალ წელს საყვარელ ადამიანთან ერთად ამაღლებულ განწყობაზე უნდა შეხვდეთ. თქვენ მარტო არ ხართ, გვერდით გყავთ ადამიანი, რომელიც გიყვართ და რომელსაც უყვარხართ. ბედნიერებისთვის ყველა მიზეზი გაქვთ, თუმცა მხოლოდ საკუთარ სურვილებსა და ინტერესებზე ზრუნვა საკმარისი არ არის. ძველი წლის უკანასკნელ დღეს ან ახალი წლის პირველ დღეს აუცილებლად გამონახეთ დრო ქველმოქმედებისთვის. პარტნიორთან ერთად იმ ადამიანებს დაეხმარეთ, რომლებსაც ბედნიერებისთვის ძალიან ბევრი რამ აკლიათ.

15. შინაური ცხოველის შეფარება

ახალ წელს ისეთი შინაური ცხოველი შეიფარეთ, რომელსაც თქვენი დახმარება სჭირდება. ცხოველთა თავშესაფარში მიდით და რომელიმე უპატრონო ძაღლს ან კატას დაეხმარეთ. რა თქმა უნდა, აღნიშნულ საკითხზე თქვენს საყვარელ ადამიანს წინასწარ უნდა შეუთანხმდეთ. მსგავსი გადაწყვეტილების იმპულსურად მიღება სწორი არ არის. ორივე უნდა აცნობიერებდეთ, რომ შინაურ ცხოველს მოვლა და მზრუნველობა სჭირდება. თუ ცხოველები ორივეს გიყვართ და მათზე ზრუნვისთვის მზად ხართ, ახალი წლისთვის ერთმანეთს რომანტიკული საჩუქარი გაუკეთეთ და რომელიმე ცხოველი შეიფარეთ. ოჯახის ახალი წევრი ორივეს გაგაბედნიერებთ.

მომზადებულია brides.com-ის მიხედვით

თარგმნა ია ნაროუშვილმა

წაიკითხეთ სრულად

შეიძლება დაინტერესდეთ