Baby Bag

იაპონელი მილიარდერი რომანტიკულ პარტნიორს ეძებს, რომელიც მასთან ერთად მთვარეზე იმოგზაურებს

იაპონელი მილიარდერი რომანტიკულ პარტნიორს ეძებს, რომელიც მასთან ერთად მთვარეზე იმოგზაურებს
იაპონელი მილიარდერი, რომელიც მთვარეზე გასამგზავრებლად ემზადება, რომანტიკულ პარტნიორს ეძებს. ექსცენტრიკული ოლიგარქი იუსაკუ მაეზავა სპეციალურ განცხადებას აქვეყნებს. „გინდათ გახდეთ „პირველი ქალბატონი,“ რომელიც მთვარეზე იმოგზაურებს?“ - ნათქვამია მაეზავას განცხადებაში.

მაეზავა დიდი ხნის მანძილზე ოცნებობდა კოსმოსში მოგზაურობაზე. მილიარდერს მისთვის ძალიან მნიშვნელოვანი ადგილის ნახვა განსაკუთრებულ ადამიანთან ერთად სურს. მაეზავა მზად არის თავისი ბედი სამუდამოდ დაუკავშიროს იმ ადამიანს, რომელთან ერთადაც მთვარეზე გაემგზავრება. ის სერიოზული ურთიერთობისთვის ემზადება.

იუსაკუ მაეზავა ელონ მასკის Space X-ის მიერ შერჩეული პირველი ადამიანია, რომელიც მთვარეზე უნდა გაემგზავროს. მაეზავა სპეციალური მისიით მიემგზავრება, რომელიც 2023 წლისთვის არის დაგეგმილი.

იაპონელი მილიარდერი იმ ძირითად მოთხოვნებსაც გვიმხელს, რომელსაც მისი რჩეული აუცილებლად უნდა აკმაყოფილებდეს: მაეზავას რჩეული სულ ცოტა 20 წლის მაინც უნდა იყოს, მას პოზიტიური ხასიათი უნდა ჰქონდეს, ქალბატონი კოსმოსში მოგზაურობით ძალიან უნდა იყოს დაინტერესებული, მას სიცოცხლით ტკბობა უნდა შეეძლოს და რაც მთავარია, სამყაროში მშვიდობის დამყარებაზე უნდა ოცნებობდეს.

იუსაკუ მაეზავა იმედს გამოთქვამს, რომ თავისი რჩეულის პოვნას მარტის თვემდე შეძლებს. თვის დასაწყისში იაპონელმა მილიარდერმა კიდევ ერთი ექსცენტრიკული განცხადება გააკეთა. მან 9 მილიონი ამერიკული დოლარი მისი Twitter-ის გვერდის გამომწერებს საჩუქრად გადასცა, რადგან აინტერესებდა, რამდენად გააბედნიერებდა ამ ადამიანებს მოულოდნელი საჩუქრით. მაეზავამ აღნიშნული 9 მილიონი 1000 გამომწერზე გადაანაწილა. გამომწერები მან Twitter-ზე აქტიურობის მიხედვით შეაფასა. ადამიანებმა, რომლებიც მის პოსტებს აქტიურად აზიარებდნენ, მილიარდერისგან საჩუქრად საკმაოდ სოლიდური თანხა მიიღეს. „ეს ძალიან სერიოზული სოციალური ექსპერიმენტია“ - განაცხადა ექსცენტრიკულმა მილიარდერმა. მაეზავას იმედი აქვს, რომ Twitter-ის ექსპერიმენტი აკადემიკოსებისა და ეკონომისტების ყურადღებას მიიპყრობს. 

მომზადებულია ​nbcnews.com-ის მიხედვით
თარგმნა ია ნაროუშვილმა 

შეიძლება დაინტერესდეთ

8 ფრაზა, რომელიც მშობლებმა თავიანთი ლექსიკონიდან უნდა ამოიღონ

8 ფრაზა, რომელიც მშობლებმა თავიანთი ლექსიკონიდან უნდა ამოიღონ

დაუფიქრებლად ნათქვამი სიტყვები არამხოლოდ პატარებს, დიდებსაც ხშირად უდიდეს ტკივილს აყენებს. ბავშვები ცხოვრების შეცნობას იწყებენ, მათ სამყაროზე წარმოდგენები უყალიბდებათ. მათთან საუბრისას მშობლებს განსაკუთრებული სიფრთხილე მართებთ. ჩვენს სტატიაში იმ 8 დამაზიანებელ ფრაზას გაგაცნობთ, რომელიც მშობლებმა ლექსიკონიდან უნდა ამოიღონ.

1. შენი არ მჯერა!

ბავშვთან გახსნილი ურთიერთობის ჩამოყალიბება ყველა მშობლისთვის მნიშვნელოვანია. თუ გსურთ, რომ შვილი გენდობოდეთ და მისი პრობლემების საქმის კურსში იყოთ, არასდროს უთხრათ მას, რომ ის მატყუარაა და მისი არ გჯერათ. ეს თქვენსა და ბავშვს შორის ურთიერთობას უდიდეს ზიანს მიაყენებს და ბავშვი თქვენ მიმართ ნდობას დაკარგავს.

2. სახლიდან მივდივარ და არასდროს დავბრუნდები!

მუქარა კომუნიკაციის ნეგატიური ფორმაა. თუ ბავშვი ურჩობს და ცუდად იქცევა, ის უკვე სტრესულ მდგომარეობაშია. თუ მას დაემუქრებით, რომ სახლიდან წახვალთ და ვეღარ გნახავთ, ეს კიდევ უფრო დასტრესავს ბავშვს და ის უსაფრთხოების განცდასაც დაკარგავს. თუ შვილთან კამათი მწვავდება და გრძნობთ, რომ ნეგატიური ფრაზების წარმოთქმის სურვილი გიჩნდებათ, სჯობს, გაჩუმდეთ და შვილსაც დამშვიდებისკენ მოუწოდოთ. საუბარი კი სხვა დროისთვის გადადეთ.

3. არასდროს შეიცვლები!

სიტყვები „ყოველთვის“ ან „არასდროს“ თქვენი ლექსიკონიდან ამოიღეთ. მსგავსი სიტყვით დაწყებული ფრაზა ბავშვს უიმედო მდგომარეობაში აგდებს. „ყოველთვის გეშლება!“ „არასდროს შეიცვლები!“ - ბავშვს ნეგატიურ ფსიქოლოგიურ ჩარჩოს უყალიბებს. ის პასიურდება და ბედს ეგუება.

4. იმიტომ, რომ მე ასე ვამბობ!

მშობელი ამ ფრაზით ბავშვს აგრძნობინებს, რომ მისი აზრები და სურვილები უმნიშვნელოა. ბავშვი ვერც ვითარებაში ერკვევა და ვერ იგებს, რატომ უნდა გააკეთოს ან არ გააკეთოს რაღაც. თუ ბავშვები ეზოში ჩაყვანას გთხოვენ, თქვენ კი ჭურჭელი გაქვთ გასარეცხი, ნაცვლად იმისა, რომ უთხრათ: „ეზოში არ ჩავალთ, იმიტომ, რომ მე ასე ვამბობ,“ უთხარით, რომ ჭურჭელი გაქვთ დასარეცხი, რის გამოც ვერ ახერხებთ ეზოში მათ ჩაყვანას.

5. თვითონ უნდა იცოდე!

ბავშვისთვის „სულელის“ წოდება მისი უპატივცემულობა და დამცირებაა. როდესაც მის კითხვას დაცინვით პასუხობთ და უმტკიცებთ, რომ მან პასუხი თავად უნდა იცოდეს, ეს ბავშვს სასოწარკვეთაში აგდებს. ის თქვენს სიტყვებს მეტისმეტი სერიოზულობით იღებს და თვლის, რომ უფროსებმა ყველაფერი ზუსტად იციან.

6. წვნიანს თუ შეჭამ, დესერტს მიიღებ

ეს ფრაზა ბავშვს არწმუნებს, რომ დესერტი ყველაზე კარგი და სასურველი საკვებია. თუ გსურთ, რომ ბავშვს მავნე კვებითი ჩვევები არ ჩამოუყალიბდეს, დესერტი ჯილდოს სახით არასდროს გამოიყენოთ.

7. დარწმუნებული ხარ, რომ შეგიძლია?

ჰიპერმზრუნველი მშობლები შვილების შესაძლებლობებს ყოველთვის ეჭვით უყურებენ და ნებისმიერი ინიციატივისგან მათ დაცვას ცდილობენ. ამ მიზნით ისინი ხშირად ბავშვებს გარკვეული ნაბიჯების გადადგმას უკრძალავენ. ეს ბავშვის თავდაჯერებულობაზე ძალიან ნეგატიურად აისახება. ბავშვს მომავალში საკუთარ გადაწყვეტილებებზე პასუხისმგებლობის აღება გაუჭირდება.

8. მძულს ჩემი სამსახური

სამსახურში ცუდი დღეები ყველას აქვს. შესაძლოა, სახლში დაბრუნებულმა მეუღლეს შესჩივლოთ, რომ თქვენი სამსახური გძულთ. თქვენმა ფრაზამ, შესაძლოა, ბავშვი დაარწმუნოს, რომ სამსახური საშინელი რამ არის. თუ ბავშვი ამ ფრაზას ხშირად ისმენს, მას მომავალში პროფესიის არჩევა გაუჭირდება.

წყარო: ​brightside.me 

წაიკითხეთ სრულად