Baby Bag

2021-2022 სასწავლო წლიდან სკოლებში პროექტი „შემოაღე კარი მეცნიერებაში“ ახალ ეტაპზე გადადის

2021-2022 სასწავლო წლიდან სკოლებში პროექტი „შემოაღე კარი მეცნიერებაში“ ახალ ეტაპზე გადადის

ახალი სასწავლო წლიდან პროექტი „შემოაღე კარი მეცნიერებაში“, რომელიც სკოლებისა და სამეცნიერო-კვლევითი დაწესებულებების თანამშრომლობას გულისხმობს, ახალ ეტაპზე გადადის. პროექტის ფარგლებში, მოსწავლეები მათ მიერვე შერჩეულ კვლევით ინსტიტუტს ეწვევიან, მეცნიერთა საქმიანობას გაეცნობიან და მიიღებენ უახლეს ინფორმაციას მიმდინარე კვლევებისა და სამეცნიერო პროექტების შესახებ. „შემოაღე კარი მეცნიერებაში“, მეცნიერების პოპულარიზაციის მიზნით, განათლებისა და მეცნიერების პროექტის „მეცნიერების კალენდარი – 2021“ ფარგლებში ხორციელდება.

აღნიშნულთან დაკავშირებით საქართველოს განათლებისა და მეცნიერების მინისტრის პირველმა მოადგილემ ეკატერინე დგებუაძემ და მინისტრის მოადგილემ ნუნუ მიცკევიჩმა პროექტით დაინტერესებული სამეცნიერო-კვლევით ინსტიტუტების, სკოლებისა და რესურსცენტრების წარმომადგენლებთან სამუშაო შეხვედრა გამართეს.

ნუნუ მიცკევიჩმა შეკრებილ საზოგადოებას აქტიური ჩართულობისთვის მადლობა გადაუხადა და მათთან ერთად პროექტის განხორციელების გზები და შესაძლებლობები განიხილა. მინისტრის მოადგილის თქმით, 2020 წელს შეიქმნა ინტერნეტპლატფორმა „შემოაღე კარი მეცნიერებაში“, სადაც განთავსებულია სამეცნიერო-კვლევითი ინსტიტუტების საქმიანობის ამსახველი ვიდეოსიუჟეტები და წარმატებული მეცნიერების მონათხრობები. პლატფორმამ მოსწავლეებს შორის დიდი ინტერესი გამოიწვია და მათ სხვადასხვა კვლევით დაწესებულებებთან თანამშრომლობის სურვილი გამოთქვეს.

ღონისძიებას ასევე ესწრებოდა შოთა რუსთაველის საქართველოს ეროვნული სამეცნიერო ფონდის გენერალური დირექტორი ჯაბა სამუშია, რომელმაც შეხვედრის მონაწილეებს მოსწავლეებში მეცნიერების პოპულარიზაციის მიმართულებით ფონდის კონკურსები გააცნო. მან აღნიშნა, რომ სკოლის მოსწავლეებისათვის განკუთვნილი საგრანტო კონკურსები უახლოეს მომავალში გამოცხადდება, კერძოდ, „მეცნიერება იწყება სკოლიდან - კვლევები მოსწავლეთა მონაწილეობით“ და მოსწავლე გამომგონებელთა და მკვლევართა კონკურსის ,,ლეონარდო და ვინჩი“. აღნიშნულ კონკურსებში მოსწავლეებთან ერთად კონკრეტულ დარგში მოღვაწე მეცნიერებიც აქტიურად იქნებიან ჩართული.

პროექტს მეცნიერების კალენდარი – 2021“საქართველოს განათლებისა და მეცნიერების სამინისტრო მეცნიერების პოპულარიზაციის მიზნით ახორციელებს. პროექტის სლოგანია Undique scientia est (მეცნიერება ყველგან არის) და გულისხმობს მეცნიერების, როგორც საზოგადოების ყველა ფენის ყოველდღიური ცხოვრების ნაწილის წარმოჩენას და ფართო საზოგადოებაში მის პოპულარიზაციას. პროექტის ფარგლებში საქართველოს მასშტაბით წლის განმავლობაში არაერთი საგანმანათლებლო და შემეცნებითი ღონისძიება იმართება.

შეიძლება დაინტერესდეთ

მასწავლებლობის მაძიებელთა შესახებ ბრძანებაში ცვლილებაა

მასწავლებლობის მაძიებელთა შესახებ ბრძანებაში ცვლილებაა

„მასწავლებლობის მაძიებელთა რეგისტრაციის და მასწავლებლობის მაძიებლობის პერიოდის გავლის წესისა და მასწავლებლობის მაძიებლობის პერიოდის გავლის დამადასტურებელი დოკუმენტის ნიმუშისა და გაცემის წესის დამტკიცების შესახებ“ ბრძანებაში ცვლილებაა. 

​შესაბამისი დოკუმენტი საკანონმდებლო მაცნეში გამოქვეყნდა და მას განათლებისა და მეცნიერების მინისტრი მიხეილ ჩხენკელი აწერს ხელს.

ცვლილების თანახმად, ბრძანებას დაემატა შემდეგი პუნქტები:
„მასწავლებლობის მაძიებელი, მასწავლებლობის მაძიებლობის მოკლევადიან (ინტენსიურ) პროგრამაზე რეგისტრაციის შემდეგ, ამ პროგრამაზე რეგისტრაციიდან არაუმეტეს 2 წლის განმავლობაში, პირადი განცხადების საფუძველზე, ზოგადსაგანმანათლებლო დაწესებულებასთან გაფორმებული იგივე შრომითი ხელშეკრულების ფარგლებში, უფლებამოსილია დარეგისტრირდეს (გადავიდეს) მასწავლებლობის მაძიებლობის გრძელვადიან პროგრამაზე.


მასწავლებლობის მაძიებლის მიერ მასწავლებლობის მაძიებლობის გრძელვადიან პროგრამაზე რეგისტრაციის შემთხვევაში, მასწავლებლობის მაძიებელი თავისუფლდება იმ აქტივობებისაგან, რომლებიც ზოგადსაგანმანათლებლო დაწესებულების მიერ მასწავლებლობის მაძიებლობის მოკლევადიანი (ინტენსიური) პროგრამის ფარგლებში დადებითად არის შეფასებული.“

​იხილეთ ​ბრძანება

წაიკითხეთ სრულად