Baby Bag

,,ახალი სკოლის მოდელში" ჩართული მასწავლებლები ვერ მიიღებენ რაიმე ბონუსებს, რაც საჭიროა სქემაში წინსვლისთვის. ჩვენ არ ვმოქმედებთ ამ პრინციპით''

,,ახალი სკოლის მოდელში" ჩართული მასწავლებლები ვერ მიიღებენ რაიმე ბონუსებს, რაც საჭიროა სქემაში წინსვლისთვის. ჩვენ არ ვმოქმედებთ ამ პრინციპით''

განათლების, მეცნიერების, კულტურისა და სპორტის სამინისტროს ზოგადი განათლების სამმართველოს უფროსი მარიამ ჩიქობავა სოციალურ ქსელში ,,ახალი სკოლის მოდელის'' პროექტზე საუბრობს. გთავაზობთ მის პოსტს სიტყვა-სიტყვით:

,,მეგობრებო, კოლეგებო, როგორც იცით, საქართველოს 600-მდე სკოლა ჩართულია ეროვნული სასწავლო გეგმის დანერგვის მხარდამჭერ პროექტში - "ახალი სკოლის მოდელი".

1. ამ პროექტში ჩართვა არის ნებაყოფლობითი. მეორე სემეტრიდან 600-ზე მეტმა სკოლამ მოგვმართა, მაგრამ ამდენი ვერ ჩავრთეთ, რადგან ადამიანური რესურსი დასაზღვრულია,;დავამატეთ 300-მდე სკოლა, მეორე - 300-ს სექტემბრიდან ჩავრთავთ;

2. ვინც ჩართულია, იმ სკოლების წარმომადგენელ პედაგოგებს აქვთ შესაძლებლობა (და არა ვალდებულება), რომ დაესწრონ კვირაში სამჯერ საკონსულტაციო შეხვედრებს. ეს არის სკოლების მხარდაჭერა და დახმარება, მაგრამ არა - თავსმოხვევა. თუკი კონკრეტული მასწავლებელი თვლის, რომ თავად შეუძლია მესამე თაობის ეროვნული სასწავლო გეგმის მოთხოვნების გათვალისწინებით წარმართოს სწავლა-სწავლების პროცესი, ამას მხოლოდ მივესალმებით. მაგრამ თუ კი გსურთ სამინისტროს ეროვნული სასწავლო გეგმების გუნდისგან მესამე თაობის ეროვნული სასწავლო გეგმის პრინციპების გაცნობა, მაშინ სიამოვნებით ვითანამშრომლებთ თქვენთან;

3. ჩართულ სკოლებს და მასწავლებლებს მხოლოდ მადლობას ვეტყვით, ვინაიდან თქვენთან თანამშრომლობა, პირველ რიგში, ჩვენ გვჭირდება. მიუხედავად იმისა, რომ სამინისტროს საგნობრივი ექსპერტების უმრავლესობა თავად არის მასწავლებელი, ჩვენთვის უმნიშვნელოვანესია მასწავლებლებში დაგროვილი გამოცდილების გაზიარება, ამ პოტენციალის განვითარება და მოსწავლეების წინსვლაზე ერთობლივად ზრუნვა;

4. ყველა იმ სკოლისთვის - საჯარო და კერძოსთვის - რომლებიც ამ ეტაპზე ვერ ერთვებიან, მაგრამ სურვილი აქვთ, ღიაა საკონსულტაციო რეჟიმი. ყველა მსურველი პედაგოგისთვის (და ასეთი ორიათასზე მეტი იყო პირველ სემესტრში) დაგეგმილია მთელი სემესტრის განმავლობაში კვირაში ორჯერ საკონსულტაციო შეხვედრები. ჩასართავად მიმართეთ თქვენს დირექტორებს, რესურსცენტრებს, ან სამინისტროს, ან მე პირადად. გასული სემესტრიდან ჩართული მოხალისე მასწავლებლების დამსახურებაა დიდწილად, რომ მეორე სემესტრში 600-ზე მეტმა სკოლამ მოგვმართა;

5. "ახალი სკოლის მოდელში" ჩართული მასწავლებლები ვერ მიიღებენ რაიმე ბონუსებს, რაც საჭიროა სქემაში წინსვლისთვის. ჩვენ არ ვმოქმედებთ ამ პრინციპით. ჩვენ მხოლოდ თქვენი მოტივაცია და თქვენი მონდომება გვეიმედება, ამიტომ ჯილდოებს არ გაძლევთ, მაგრამ შეგაიარაღებთ ისეთი ძალით, რომელსაც შემოქმედებითი თავისუფლება და კიდევ უფრო მეტი თავდაჯერება ჰქვია, გაგაცნობთ ისეთ მიდგომებს, რომლებიც შეიძლება საინტერესო აღმოჩნდეს თქვენთვის და კიდევ უფრო მეტი ბიძგი მოგცეთ სიახლეების დასანერგად;

6. აქვე იმასაც ვიტყვი, რომ 400-მდე საგნის ექსპერტიდან, რომლითაც მთელ საქართველოს ვფარავთ, შესაძლოა ყველა არ აკმაყოფილებდეს ისეთ დონეს, როგორსაც ვისურვებდით, მაგრამ ჩვენც ვსწავლობთ, ვვითარდებით, თქვენგან ვსწავლობთ და ასე ურთიერთდახმარებით წინ მივდივართ.

დაბოლოს, კიდევ ერთხელ მინდა დაგიდასტუროთ, რომ ეს არის მხოლოდ თქვენს მხარდაჭერაზე მიმართული პროექტი. ჩვენი ექსპერტები არ არიან თქვენი მენტორები, რომლებმაც ჭკუა უნდა გასწავლოთ. ვინც ჩართულები ხართ, ამას აუცილებლად იგრძნობდით უკვე, სადღაც იქნება ცალკეული გამონაკლისებიც ალბათ, მაგრამ ჩვენი ექსპერტების აბსოლუტური უმრავლესობა ძალიან კეთილგანწყობილ გარემოს ქმნის თქვენთვის, მათ სწამთ და სჯერათ, რომ კეთილშბილურ საქმეს ემსახურებიან და ეს ნამდვილად გადამდებია. სამინისტროს ეროვნული სასწავლო გეგმების გუნდის დამოკიდებულება და განწყობა ასეთია: ვეხმარებით ერთმანეთს წინსვლისთვის, სადაც სისუსტეს იგრძნობთ, იქ შემოგეშველებით. არანაირი ფორმალობები, ან ქაღალდზე შესრულებული აქტივობები ჩვენ არ გვჭირდება, არც საჩვენებელი გაკვეთილები. ამიტომ არ გვაქვს ამ პროექტში გაკვეთილზე დასწრება და შემოწმება. ჩვენთვის მნიშვნელოვანია თუნდაც ერთი წინგადადგმული ნაბიჯი, გუშინდელზე უკეთესი გაკვეთილი, ჩვენთვის მნიშვნელოვანია თქვენ არ იყურებოდეთ საათზე, რომ გაკვეთილის მეორე ან მესამე ფაზა არ გამოგრჩეთ, ჩვენთვის მნიშვნელოვანია თქვენი შემოქმედებითი თავისუფლება, მნიშვნელოვანია გაყვეთ კლასს; კლასს არა, თითოეულ მოსწავლეს და ამისთვის სწორედ იმდენი დრო დახარჯოთ, რამდენიც დაგჭირდებათ, ისეთი აქტივობები გამოიყენოთ, რომელსაც თქვენი მოსწავლეები ინტერესით გაყვებიან,'' - აღნიშნავს მარიამ ჩიქობავა. 

თუ გინდათ, რომ განათლების სფეროში მიმდინარე სიახლეების შესახებ ინფორმირებულები იყოთ, მოიწონეთ გვერდი „მასწა​ვლებლების სანდო წყარო“

შეიძლება დაინტერესდეთ

​მასწავლებელმა არ უნდა დაივიწყოს, რომ ხელოვანია

​მასწავლებელმა არ უნდა დაივიწყოს, რომ ხელოვანია

ყველა მასწავლებელს აქვს განსხვავებული სწავლების სტილი, ისევე, როგორც მხატვარს ხატვის, რეჟისორს ფილმის გადაღების, მწერალს ამბის გადმოცემის, მუსიკოსს მელოდიის შექმნის. სწორედ ამიტომ, ჩვენი პროფესია იმაზე უფრო მეტად ენათესავება ხელოვნების სფეროს, ვიდრე წარმოგვიდგენია. როგორც ყველა ხელოვანი, ჩვენც საკუთარ ნიჭსა და შესაძლებლობებს ვწვრთნით, მაგრამ რამდენად შევძლებდით ამას თავისუფალი ნების გარეშე, თავისუფალი სიტყვის და ქცევის გარეშე? ჩვენი გამოცდილება ხომ ჩვენი ფუნჯია, რომელმაც რაღაც უნდა შექმნას, რაღაც ისეთი, რაც მნიშვნელოვანი და დამაფიქრებელი გახდება. იმისთვის რომ ხელოვანი გახდე, მხოლოდ ნიჭი არაა საკმარისი, გამბედაობა და საკუთრი იდენტობით მოქმედებაა საჭირო მასწავლებლის შემთხვევაშიც. 

ნებისმიერ პროფესიაში თუ გინდა წარმატებული იყო, პირველ რიგში, შენ უნდა იყო შენ, თუნდაც არასრულყოფილი. ჩვენ მუდმივად ვცდილობთ სოციალური როლების მორგებას ეს გასაგებია, რადგან ადამიანი სოციალურ ცხოველია, თუმცა აქ უფრო მნიშვნელოვან საკითხს ვაწყდებით, როლი, რომელიც მოვირგეთ საფრთხეს ხომ არ უქმნის ჩვენს იდენტობას? რამდენი პროცენტით ვარ მე მე?

მასწავლებლები ხშირად იკარგებიან საკუთარ სწავლების სტილში მკაცრი, მზრუნველი, მეგობრული, განსხვავებული, უხეში, გულგრილი... უამრავი ტიპის მასწავლებელს შევხვედრილვართ, ბევრის მიმართ უარყოფითი დამოკიდებულებაც გვქონდა, თუმცა ყურადღების მიღმა არ დარჩენილა მათი გულწრფელობა. ისინი ხომ ისე გვასწავლიდნენ როგორც ახალ ხასიათს და მიუხედავად ჩვენი დამოკიდებულებისა, რომელიც არც თუ ისე სასიამოვნო შეიძლება ყოფილიყო, ერთი წამითაც არ შეგვპარვია ეჭვი მათ გულწრფელობაში. ალბათ, სწორედ ამიტომ ვირჩევთ ამ პროფესიას, ის ხომ შესაძლებლობას გვაძლევს ჩვენი იდენტობით ვიმუშაოთ, ვიყოთ შემოქმედები და ისეთები, როგორიც ვართ. ხშირად გაბატონებულ წარმოდგენებს უფრო მეტ მნიშვნელობას ვანიჭებთ, ვიდრე საკუთარი თავისუფალი ნების არსს. ხომ გვინახავს ისეთი მასწავლებლებიც სკოლის კართან რომ ტოვებენ საკუთარ პიროვნებას და სრულიად სხვა ადამინები ხდებიან სასწავლო დღის დასრულებამდე. ალბათ, სწორედ ამიტომ იწყება პროფესიული კრიზისიც, თუმცა არც ესაა პრობლემა. 

უნდა გვახსოვდეს, რომ ადამიანს შეუძლია გახდეს უკეთესი, მაგრამ არა სრულყოფილი. ხშირად საჭიროა, საკუთარ თავს შევახსენოთ, ვინ ვართ, მხოლოდ ასე შევძლებთ, ვუპასუხოთ ჩვენს მოლოდინებს, შეიძლება, დეპრესიაც გვქონდეს, თავი ცუდად ვიგრძნოთ, მაგრამ არასდროს არ უნდა დაგვავიწყდეს, რომ ხელოვანები ვართ, კრეატიული და ყველაზე თავისუფალი პროფესიის წარმომადგენლები. ყველაფერი კი, რაც ჩვენს თავს ხდება, გამოცდილებაა, გამოცდილება, რომელიც მთავარი იარაღია საჭირო საქმის საკეთებლად.

ავტორი: სამოქალაქო განათლების მასწავლებელი მზეო შველიძე 
წაიკითხეთ სრულად