Baby Bag

,,ახალი სკოლის მოდელში" ჩართული მასწავლებლები ვერ მიიღებენ რაიმე ბონუსებს, რაც საჭიროა სქემაში წინსვლისთვის. ჩვენ არ ვმოქმედებთ ამ პრინციპით''

,,ახალი სკოლის მოდელში" ჩართული მასწავლებლები ვერ მიიღებენ რაიმე ბონუსებს, რაც საჭიროა სქემაში წინსვლისთვის. ჩვენ არ ვმოქმედებთ ამ პრინციპით''

განათლების, მეცნიერების, კულტურისა და სპორტის სამინისტროს ზოგადი განათლების სამმართველოს უფროსი მარიამ ჩიქობავა სოციალურ ქსელში ,,ახალი სკოლის მოდელის'' პროექტზე საუბრობს. გთავაზობთ მის პოსტს სიტყვა-სიტყვით:

,,მეგობრებო, კოლეგებო, როგორც იცით, საქართველოს 600-მდე სკოლა ჩართულია ეროვნული სასწავლო გეგმის დანერგვის მხარდამჭერ პროექტში - "ახალი სკოლის მოდელი".

1. ამ პროექტში ჩართვა არის ნებაყოფლობითი. მეორე სემეტრიდან 600-ზე მეტმა სკოლამ მოგვმართა, მაგრამ ამდენი ვერ ჩავრთეთ, რადგან ადამიანური რესურსი დასაზღვრულია,;დავამატეთ 300-მდე სკოლა, მეორე - 300-ს სექტემბრიდან ჩავრთავთ;

2. ვინც ჩართულია, იმ სკოლების წარმომადგენელ პედაგოგებს აქვთ შესაძლებლობა (და არა ვალდებულება), რომ დაესწრონ კვირაში სამჯერ საკონსულტაციო შეხვედრებს. ეს არის სკოლების მხარდაჭერა და დახმარება, მაგრამ არა - თავსმოხვევა. თუკი კონკრეტული მასწავლებელი თვლის, რომ თავად შეუძლია მესამე თაობის ეროვნული სასწავლო გეგმის მოთხოვნების გათვალისწინებით წარმართოს სწავლა-სწავლების პროცესი, ამას მხოლოდ მივესალმებით. მაგრამ თუ კი გსურთ სამინისტროს ეროვნული სასწავლო გეგმების გუნდისგან მესამე თაობის ეროვნული სასწავლო გეგმის პრინციპების გაცნობა, მაშინ სიამოვნებით ვითანამშრომლებთ თქვენთან;

3. ჩართულ სკოლებს და მასწავლებლებს მხოლოდ მადლობას ვეტყვით, ვინაიდან თქვენთან თანამშრომლობა, პირველ რიგში, ჩვენ გვჭირდება. მიუხედავად იმისა, რომ სამინისტროს საგნობრივი ექსპერტების უმრავლესობა თავად არის მასწავლებელი, ჩვენთვის უმნიშვნელოვანესია მასწავლებლებში დაგროვილი გამოცდილების გაზიარება, ამ პოტენციალის განვითარება და მოსწავლეების წინსვლაზე ერთობლივად ზრუნვა;

4. ყველა იმ სკოლისთვის - საჯარო და კერძოსთვის - რომლებიც ამ ეტაპზე ვერ ერთვებიან, მაგრამ სურვილი აქვთ, ღიაა საკონსულტაციო რეჟიმი. ყველა მსურველი პედაგოგისთვის (და ასეთი ორიათასზე მეტი იყო პირველ სემესტრში) დაგეგმილია მთელი სემესტრის განმავლობაში კვირაში ორჯერ საკონსულტაციო შეხვედრები. ჩასართავად მიმართეთ თქვენს დირექტორებს, რესურსცენტრებს, ან სამინისტროს, ან მე პირადად. გასული სემესტრიდან ჩართული მოხალისე მასწავლებლების დამსახურებაა დიდწილად, რომ მეორე სემესტრში 600-ზე მეტმა სკოლამ მოგვმართა;

5. "ახალი სკოლის მოდელში" ჩართული მასწავლებლები ვერ მიიღებენ რაიმე ბონუსებს, რაც საჭიროა სქემაში წინსვლისთვის. ჩვენ არ ვმოქმედებთ ამ პრინციპით. ჩვენ მხოლოდ თქვენი მოტივაცია და თქვენი მონდომება გვეიმედება, ამიტომ ჯილდოებს არ გაძლევთ, მაგრამ შეგაიარაღებთ ისეთი ძალით, რომელსაც შემოქმედებითი თავისუფლება და კიდევ უფრო მეტი თავდაჯერება ჰქვია, გაგაცნობთ ისეთ მიდგომებს, რომლებიც შეიძლება საინტერესო აღმოჩნდეს თქვენთვის და კიდევ უფრო მეტი ბიძგი მოგცეთ სიახლეების დასანერგად;

6. აქვე იმასაც ვიტყვი, რომ 400-მდე საგნის ექსპერტიდან, რომლითაც მთელ საქართველოს ვფარავთ, შესაძლოა ყველა არ აკმაყოფილებდეს ისეთ დონეს, როგორსაც ვისურვებდით, მაგრამ ჩვენც ვსწავლობთ, ვვითარდებით, თქვენგან ვსწავლობთ და ასე ურთიერთდახმარებით წინ მივდივართ.

დაბოლოს, კიდევ ერთხელ მინდა დაგიდასტუროთ, რომ ეს არის მხოლოდ თქვენს მხარდაჭერაზე მიმართული პროექტი. ჩვენი ექსპერტები არ არიან თქვენი მენტორები, რომლებმაც ჭკუა უნდა გასწავლოთ. ვინც ჩართულები ხართ, ამას აუცილებლად იგრძნობდით უკვე, სადღაც იქნება ცალკეული გამონაკლისებიც ალბათ, მაგრამ ჩვენი ექსპერტების აბსოლუტური უმრავლესობა ძალიან კეთილგანწყობილ გარემოს ქმნის თქვენთვის, მათ სწამთ და სჯერათ, რომ კეთილშბილურ საქმეს ემსახურებიან და ეს ნამდვილად გადამდებია. სამინისტროს ეროვნული სასწავლო გეგმების გუნდის დამოკიდებულება და განწყობა ასეთია: ვეხმარებით ერთმანეთს წინსვლისთვის, სადაც სისუსტეს იგრძნობთ, იქ შემოგეშველებით. არანაირი ფორმალობები, ან ქაღალდზე შესრულებული აქტივობები ჩვენ არ გვჭირდება, არც საჩვენებელი გაკვეთილები. ამიტომ არ გვაქვს ამ პროექტში გაკვეთილზე დასწრება და შემოწმება. ჩვენთვის მნიშვნელოვანია თუნდაც ერთი წინგადადგმული ნაბიჯი, გუშინდელზე უკეთესი გაკვეთილი, ჩვენთვის მნიშვნელოვანია თქვენ არ იყურებოდეთ საათზე, რომ გაკვეთილის მეორე ან მესამე ფაზა არ გამოგრჩეთ, ჩვენთვის მნიშვნელოვანია თქვენი შემოქმედებითი თავისუფლება, მნიშვნელოვანია გაყვეთ კლასს; კლასს არა, თითოეულ მოსწავლეს და ამისთვის სწორედ იმდენი დრო დახარჯოთ, რამდენიც დაგჭირდებათ, ისეთი აქტივობები გამოიყენოთ, რომელსაც თქვენი მოსწავლეები ინტერესით გაყვებიან,'' - აღნიშნავს მარიამ ჩიქობავა. 

თუ გინდათ, რომ განათლების სფეროში მიმდინარე სიახლეების შესახებ ინფორმირებულები იყოთ, მოიწონეთ გვერდი „მასწა​ვლებლების სანდო წყარო“

შეიძლება დაინტერესდეთ

დანიაში მშობლების ნაწილი სკოლების გახსნას აპროტესტებს

დანიაში მშობლების ნაწილი სკოლების გახსნას აპროტესტებს

კოპენჰაგენის სკოლებში სასწავლო პროცესი აღადგინეს. მოსწავლეები ხელებს სადეზინფექციო ხსნარით იმუშავებენ, სავალდებულო დისტანციას იცავენ და გაკვეთილებს ასე ასწრებიან. ერთ კლასში მხოლოდ 10 მოსწავლის ყოფნაა ნებადართული. მიუხედავად იმისა, რომ საგაკვეთილო პროცესი მკაცრი შეზღუდვებით მიმდინარეობს, მშობლების ნაწილი შვილების სკოლაში გაშვების კატეგორიული წინააღმდეგია. ისინი მთავრობის გადაწყვეტილებას პოლიტიკურ ექსპერიმენტად განიხილავენ და მასში მონაწილეობაზე უარს აცხადებენ.

დანია ევროპის პირველი სახელმწიფოა, რომელმაც სასწავლო პროცესი აღადგინა. ქვეყანაში შეზღუდვები 12 მარტს დაწესდა და მას შემდეგ მოქალაქეები საგანგებო რეჟიმის პირობებში ცხოვრობდნენ. დანიაში ამ დრომდე ინფიცირების 6 879 შემთხვევა გამოვლინდა, გარდაიცვალა 309 ადამიანი. აპრილის დასაწყისში პიკური ეტაპის გადავლის შემდეგ ქვეყანაში ახალი შემთხვევების რიცხვმა მნიშვნელოვნად იკლო, რის გამოც მთავრობამ შეზღუდვების ეტაპობრივი მოხსნის გადაწყვეტილება მიიღო.

მთავრობის გადაწყვეტილებას ათასობით ოჯახი დაუპირისპირდა: „რამდენიმე კვირის მანძილზე ხელისუფლება გვაფრთხილებდა, რომ ეს პანდემია უკიდურესად საშიშია და მასთან ბრძოლისთვის სოციალური დისტანცირება აუცილებელია. შემდეგ კი უცებ მოგვთხოვეს, რომ ჩვენთვის ყველაზე ძვირფასი ადამიანები, ჩვენი შვილები, სკოლებში გავუშვათ, მაშინ, როდესაც ვირუსის გავრცელება ჯერ კიდევ გრძელდება და არავინ იცის, როდის დასრულდება პანდემია,“ - ნათქვამია ერთ-ერთი მშობლის განცხადებაში.

დანიის მსგავსად, რამდენიმე ევროპული სახელმწიფო ვირუსის ახალი შემთხვევების კლებასთან ერთად შეზღუდვების მოხსნას გეგმავს. შესაძლოა, ამან აღნიშნულ ქვეყნებში მშობლების მასობრივი უკმაყოფილება გამოიწვიოს. დანიის მთავრობა დისტანციური სწავლების გვერდით ეფექტებზე ამახვილებს ყურადღებას. პრემიერ-მინისტრის თქმით, სანამ ბავშვები სახლიდან სწავლობენ, მშობლები სამსახურში სიარულს ვერ შეძლებენ, რაც დანიის მთავრობის მეთაურს ერთ-ერთ ყველაზე რთულ პრობლემად მიაჩნია.

ჟურნალ „ლანცეტში“ გამოქვეყნებულმა ერთ-ერთმა კვლევამ აჩვენა, რომ სკოლების დახურვა ვირუსის პრევენციის ეფექტური მეთოდი არ არის, თუმცა მშობლების დიდი ნაწილი აღნიშნულ მოსაზრებას არ იზიარებს. დანიელმა მშობლებმა სპეციალური facebook ჯგუფიც შექმნეს სახელწოდებით: „ჩემი შვილი covid-19-ისთვის ზღვის გოჭი არ უნდა იყოს.“ აღნიშნულ ჯგუფში უკვე 40 000-ზე მეტი ადამიანია გაწევრიანებული.

„მეგობრებო, რას ფიქრობთ ბავშვების სკოლაში გაშვებასთან დაკავშირებით? ჩემი 10 წლის შვილი ძილის წინ შეძრწუნებული მეუბნებოდა, რომ მას სკოლაში კორონავირუსით დაინფიცირების ძალიან ეშინია,“ - აღნიშნული პოსტი ჯგუფში ერთ-ერთმა მშობელმა გამოაქვეყნა.

„ბავშვებს აქვთ საფრთხისგან დაცვის უფლება. მე აღდგომის შემდეგ ჩემს შვილს სკოლაში არ გავუშვებ. ბავშვები არ უნდა გავუშვათ ომში უხილავ მტერთან,“ - აცხადებს ერთ-ერთი მოსწავლის მამა.

სამოქალაქო დაუმორჩილებლობა დანიისთვის უჩვეულო მოვლენაა. როგორც წესი, დანიის მოქალაქეები ხელისუფლებას ენდობიან და მის მითითებებს ითვალისწინებენ, თუმცა ამ შემთხვევაში, მშობლები შვილების სიცოცხლის საფრთხის წინაშე დაყენებას არ აპირებენ.

მშობლებმა სპეციალური ონლაინ პეტიციაც შექმნეს, რომლითაც მთავრობის გადაწყვეტილებას აპროტესტებენ. მას უკვე 18 000 ხელმომწერი ჰყავს. მსგავსი პეტიცია შეიქმნა ნორვეგიაშიც, სადაც სკოლებში სასწავლო პროცესის აღდგენა თვის ბოლოსთვის იგეგმება. აღნიშნულ პეტიციას 28 000-მა მშობელმა მოაწერა ხელი.

მშობლები თვლიან, რომ ბავშვებს სკოლაში მკაცრი წესების დაცვა გაუჭირდებათ, ისინი შეშინდებიან და დაისტრესებიან. მოსწავლეებს, რომლებიც გაკვეთილებს არ ესწრებიან, გაცდენა საპატიოდ არ ეთვლებათ, რაც მათი მშობლებისთვის დამატებით პრობლემას წარმოადგენს.

სოციალ-დემოკრატიულ პარტიას, რომელიც დანიას მართავს, კრიზისთან ეფექტური ბრძოლის გამო მოსახლეობის მაღალი მხარდაჭერა აქვს. თუმცა სკოლების გახსნასთან დაკავშირებით ხელისუფლების მოულოდნელი გადაწყვეტილება მოქალაქეების უკმაყოფილებას იწვევს. მიუხედავად იმისა, რომ სასწავლო პროცესი განახლდა, მშობლების 15 %-ზე მეტი შვილების სკოლაში გაშვებაზე უარს აცხადებს.

მშობლების ნაწილი თავს უსაფრთხოდ გრძნობს და თანახმაა, რომ ბავშვები სკოლაში გაგზავნოს. ზოგიერთი მათგანი კი ექსპერიმენტს შორიდან აკვირდება. ისინი აცხადებენ, რომ ორი კვირის განმავლობაში მოვლენების განვითარებას დააკვირდებიან. მშობლების თქმით, ისინი შვილებს სკოლაში მხოლოდ მას შემდეგ გაუშვებენ, თუ დარწმუნდებიან, რომ მთავრობის ახალი გადაწყვეტილება ვირუსის ხელახალ აფეთქებას არ გამოიწვევს.

მომზადებულია ​washingtonpost.com-ის მიხედვით

თარგმნა ია ნაროუშვილმა

წაიკითხეთ სრულად