Baby Bag

„როდესაც ამბობენ, რომ ეს ფორმატი არის მიუღებელი და არანაირ შედეგს არ იძლევა, კატეგორიულად ვემიჯნები ამ აზრს,“ - გია მურღულია

„როდესაც ამბობენ, რომ ეს ფორმატი არის მიუღებელი და არანაირ შედეგს არ იძლევა, კატეგორიულად ვემიჯნები  ამ აზრს,“ - გია მურღულია

ფილოლოგი, პედაგოგი გია მურღულია სკოლისა და მასწავლებლის სამი უმთავრესი მიზნის შესახებ საუბრობს. მისი თქმით, სამი მთავარი მიზნიდან ორის მიღწევა დისტანციური სწავლების პირობებში საკმაოდ რთულია:

„მასწავლებელი და სკოლა სამ მთავარ რამეს აკეთებს: ასწავლის ამა თუ იმ საგანს, მოსწავლეებში ავითარებს უნარებს, რომელთა გარეშე ძნელია, რომ ადამიანმა წარმატებაზე იფიქროს საერთოდ (მაგ. ნებისყოფა, ნებისყოფის გარეშე პიროვნება საერთოდ არ არსებობს), აყალიბებს ღირებულებათა სისტემას. ​კარგი ადამიანი უნდა გაზარდოს სკოლამ. ამ სამიდან ორი, უნარების განვითარება და აღზრდის სისტემა, დისტანციური სწავლების დროს ძალიან სუსტად გამოიყურება. შენ რომ სიკეთის მხარეს დადგე, ამას სწავლება და აღზრდა სჭირდება.“

გია მურღულიას თქმით, დაწყებით კლასებში დისტანციური სწავლება უფრო მეტ სირთულეებს უკავშირდება, ვიდრე მაღალ საფეხურებზე:

„ცხადია, ვიზიარებ აზრს, რომ ​პირველ და მეორე კლასში ამის გაკეთება შედარებით რთულია. რაც უფრო მაღალი საფეხურია, მით უფრო მარტივდება, რასაკვირველია. თუმცა ეს შესაძლებელია. როდესაც ამბობენ, რომ ეს ფორმატი არის მიუღებელი და არანაირ შედეგს არ იძლევა, კატეგორიულად ვემიჯნები მე ამ აზრს. სადაც არის კარგი მასწავლებელი და მოტივირებული მოსწავლე, იქ ძალიან კარგად ახერხებენ ბავშვები იმის გაკეთებას, რასაც დასწრებული ვითარების შემთხვევაში გააკეთებდნენ.“

გია მურღულია აღნიშნავს, რომ მშობლებს, რომლებსაც კერძო სკოლებში დაჰყავთ შვილები, ზოგჯერ სწავლის პროცესში ჩართვის სურვილი ნაკლებად აქვთ, რაც დიდი პრობლემაა:

„მშობლების განწყობა, რომ მე ფულს გადავიხდი და შენ რაც გინდა ქენი, ოღონდ​ შეასრულე ის, რაც სკოლას მოეთხოვება, ყველაზე რთულად მოსასმენი და გასაგები პოზიციაა სკოლისთვის. მე ხანდახან განცვიფრების უნარსაც ვკარგავ ხოლმე, როდესაც ასეთ პოზიციას ვისმენ. ეს ძალიან ჰგავს მშობლის სურვილს, რომ გათავისუფლდეს ბავშვის პრობლემებისგან. ასეთი საფასური არ არსებობს სამყაროში, რომ მშობელი ბავშვზე ზრუნვისგან და მასზე ფიქრისგან გათავისუფლდეს. მესმის დაკავებულობაც, სხვა ასეთი ამბებიც, ეკონომიკური პრობლემებიც, მაგრამ პასუხისმგებლობას ვერავინ მოიხსნის საკუთარი შვილის წინაშე.“

„მეთოდოლოგიური კუთხით ეს არის განსაკუთრებული სიადვილე ​თანამედროვე ტექნოლოგიების გამოყენების. თქვენ ნებისმიერ წუთს ხელთ გაქვთ შესაძლებლობა, რომ აჩვენოთ ბავშვებს რაღაც ტექსტი, იქვე მისცეთ დავალება, აჩვენოთ რაღაც მონაკვეთი რომელიმე ფილმიდან, მულტფილმიდან. ნებისმიერი შესაძლებლობა გაქვთ თქვენ, რომ თანამედროვე ტექნოლოგიები გამოიყენოთ უფრო სწრაფად, ვიდრე კლასში ახერხებდით. ეს ძალიან მნიშვნელოვანი ფაქტორია სწავლების თვალსაზრისით,“ - აღნიშნულ საკითხებზე გია მურღულიამ ტელეკომპანია იმედის" გადაცემაში „იმედის დღე“ საუბრობს.

წყარო: ​„იმედის დღე“

„ბავშვების გარეშე სკოლა ოქროდაკარგული დუმილია“ - გია მურღულია
ამის შესახებ ფილოლოგი, პედაგოგი გია მურღულია სოციალურ ქსელში წერს.

შეიძლება დაინტერესდეთ

7 საყოფაცხოვრებო საგანი, რომელსაც ყოველდღიურად ვიყენებთ, მაგრამ სათანადოდ არ ვასუფთავებთ

7 საყოფაცხოვრებო საგანი, რომელსაც ყოველდღიურად ვიყენებთ, მაგრამ სათანადოდ არ ვასუფთავებთ

ყველა დიასახლისმა იცის, რომ სახლის დასუფთავება მნიშვნელოვანი საქმეა. მიუხედავად ამისა, ყველაზე სუფთა დიასახლისებსაც კი, შესაძლოა, გარკვეული დეტალები გამოეპაროთ და ზოგიერთი საყოფაცხოვრებო საგანი ყურადღების მიღმა დარჩეთ. ჩვენს სტატიაში 7 საყოფაცხოვრებო საგანს გაგაცნობთ, რომელთა სისუფთავეს დიასახლისები სათანადო ყურადღებას იშვიათად აქცევენ.

1. მრავალჯერადი გამოყენების ჩანთები

მრავალჯერადი გამოყენების ჩანთები საყიდლებზე სიარულისთვის იდეალურია, თუმცა კვლევებით დგინდება, რომ დიასახლისები მათ იშვიათად რეცხავენ. მსგავსი ტიპის ჩანთები ხშირად სხვადასხვა პროდუქტის შესაძენად გამოიყენება, რის გამოც პროდუქტების ნარჩენები ჩანთაში რჩება, ბაქტერიები ჩანთაში მრავლდება და ნებისმიერი ახალი პროდუქტის დაბინძურება შეუძლია. ჩანთის სისუფთავის შესანარჩუნებლად განსხვავებული ტიპის პროდუქტებისთვის განსხვავებული ჩანთები გამოიყენეთ. ჩანთები რეგულარულად გარეცხეთ სარეცხი საშუალებების გამოყენებით.

2. სამზარეულოს ჭურჭლის სახელურები

დიასახლისები ჭურჭლის სახელურებს, მაგალითად, ტაფის თავსახურის სახელურს, სათანადოდ იშვიათად რეცხავენ. სახელურებს პატარა ღარები აქვს, რომელშიც ნარჩენები გროვდება, რაც ბაქტერიების გამრავლებას უწყობს ხელს. ჭურჭლის სახელურების საფუძვლიანად გასაწმენდად ძმარი უნდა გამოიყენოთ.

3. საწური/საცერი

საწურსა და საცერს დიასახლისები ხშირად ისევე რეცხავენ, როგორც ჩვეულებრივ ჭურჭელს, მაგრამ იმის გამო, რომ მსგავსი ტიპის ჭურჭელს პატარა ნასვრეტები აქვს, ის განსხვავებულ რეცხვას საჭიროებს. საწურის ან საცერის სრულფასოვანი გასუფთავებისთვის ის ჭურჭლის სარეცხი საშუალებით შეზავებულ წყალში 15 წუთის განმავლობაში უნდა შეაყოვნოთ, რათა ნასვრეტებიდან ნარჩენები საბოლოოდ გამოვიდეს. შემდეგ საწური ონკანის ქვეშ მოათავსეთ და ჯაგრისით კარგად გახეხეთ.

4. ბლენდერი

ბლენდერის პირებში უამრავი ნარჩენი გროვდება, რის გამოც მისი სრულფასოვანი გარეცხვისთვის ბლენდერის თავი ნაწილებად დაშალეთ და ჭურჭლის სარეცხი საშუალებით გაზავებულ თბილ წყალში დააყოვნეთ, შემდეგ კი გამდინარე წყალში კარგად გარეცხეთ.

5. ცოცხი

ადამიანებს ხშირად ავიწყდებათ იმ ნივთების გაწმენდა, რომლებსაც სახლის დასუფთავებისთვის იყენებენ. ცოცხთან დაკავშირებითაც იმავე პრობლემას ვაწყდებით. ცოცხი უამრავ ნარჩენს იკრავს, როგორებიცაა: თმები, მტვერი და ნაგავი. ცოცხის სისუფთავის შესანარჩუნებლად ხელთათმანების გამოყენებით მას საგულდაგულოდ მოაცილეთ ზედმეტი ნარჩენები, შემდეგ კი თბილ საპნიან წყალში გააჩერეთ. ცოცხის გარეცხვის შემდეგ ის კარგად გააშრეთ და კვლავ გამოიყენეთ.

6. იატაკის საწმენდი ტილო

დიასახლისები ფიქრობენ, რომ წყლით სავსე ვედროში ან ონკანის ქვეშ დასველებული იატაკის საწმენდი ტილო სისუფთავეს მარტივად ინარჩუნებს, რაც არასწორია. იატაკის საწმენდი მუდმივად ტენიანია, რის გამოც ბაქტერიების გამრავლებისთვის იდეალურ სივრცეს ქმნის. თქვენ კი ამ ბაქტერიებს მთელ სახლში ავრცელებთ, როდესაც ფიქრობთ, რომ იატაკს წმენდთ და ასუფთავებთ. იატაკის საწმენდი ტილო გამოყენების შემდეგ საპნითა და წყლით კარგად უნდა გარეცხოთ, შეგიძლიათ გარეცხვისთვის სარეცხი საშუალებაც გამოიყენოთ. მნიშვნელოვანია, რომ გარეცხვის შემდეგ იატაკის საწმენდი კარგად გააშროთ. ამ ორი მარტივი ნაბიჯის გადადგმის შემდეგ ის სრულფასოვნად გაასუფთავებს სახლს და უსიამოვნო სუნიც არასდროს ექნება.

7. ჭურჭლის სარეცხი ღრუბელი

ჭურჭლის სარეცხი ღრუბელი ბაქტერიების გავრცელების ერთ-ერთი წყაროა. იდეალურ შემთხვევაში, გამოყენების შემდეგ ის სწრაფად უნდა ჩაანაცვლოთ ახალი ღრუბლით, თუმცა თუ ღრუბელს ხშირად იყენებთ, გირჩევთ ის საგულდაგულოდ გარეცხოთ გამოყენების შემდეგ, რათა მომდევნო გამოყენების დროს ჭურჭელი ბაქტერიებით არ დააბინძუროს.

წყარო: ​Brightside.me

წაიკითხეთ სრულად