Baby Bag

,,ეს სკოლა არის ნათელი მაგალითი იმისა, თუ როგორ აისახება მასწავლებლების მაღალი პროფესიონალიზმი და დაუღალავი შრომა მოსწავლეების წარმატებაზე''

,,ეს სკოლა არის ნათელი მაგალითი იმისა, თუ როგორ აისახება მასწავლებლების მაღალი პროფესიონალიზმი და დაუღალავი შრომა მოსწავლეების წარმატებაზე''

საქართველოს განათლების, მეცნიერების, კულტურისა და სპორტის მინისტრმა მიხეილ ჩხენკელმა მესტიის მუნიციპალიტეტში, სოფელ წვირმის საჯარო სკოლის მშენებლობის პროცესი მოინახულა.

მიხეილ ჩხენკელის თქმით, წვირმის საჯარო სკოლა არის ნათელი მაგალითი იმისა, თუ როგორ აისახება მასწავლებლების მაღალი პროფესიონალიზმი და დაუღალავი შრომა მოსწავლეების წარმატებაზე:

„დღეს დავათვალიერეთ ზემო სვანეთის სოფელ წვირმის საჯარო სკოლის მშენებლობის პროცესი. ეს სკოლა არის ნათელი მაგალითი იმისა, თუ როგორ აისახება მასწავლებლების მაღალი პროფესიონალიზმი და დაუღალავი შრომა მოსწავლეების წარმატებაზე. ამ სკოლის მოსწავლეები, კურსდამთავრებულები, არიან არაერთი საერთაშორისო პროექტის გამარჯვებულები.

მე ძალიან მიხარია, რომ ახალ სასწავლო წელს მათ ექნებათ თანამედროვე სტანდარტებით აღჭურვილი შენობა. აქ განთავსდება კომპიუტერული ლაბორატორიები და მოსწავლეებს ექნებათ ყველა პირობა სწავლისთვის,“ - დასძინა მინისტრმა.  

სოფელ წვირმის საჯარო სკოლა 60 მოსწავლეზეა გათვლილი და მისი მშენებლობა ახალი სასწავლო წლისათვის დასრულდება. მსუბუქი კონსტრუქციის თანამედროვე სტანდარტების შესაბამისი ერთსართულიანი სკოლის შენობა ადაპტირებულია სსსმ მოსწავლეებისთვის. სასწავლო სივრცეებთან ერთად სკოლაში მოეწყობა კომპიუტერული კლასკაბინეტი, ლაბორატორია, ბიბლიოთეკა, ეზოში კი – სარეკრეაციო სივრცე. გარდა ამისა, სკოლა აღიჭურვება თანამედროვე ინვენტარითა და უახლესი კომპიუტერული ტექნიკით.

    სოფელ წვირმის საჯარო სკოლის სამშენებლო სამუშაოები ხორციელდება საგანმანათლებლო და სამეცნიერო ინფრასტრუქტურის სააგენტოს დაფინანსებით და მისი ღირებულება 1 404 640 ლარს შეადგენს

    შეიძლება დაინტერესდეთ

    „ჩვენი მასწავლებლები თავიანთი შრომით ამტკიცებენ, რომ არიან ჭეშმარიტად გმირები“ - მიხეილ ჩხენკელმა მასწავლებლის ეროვნული ჯილდოს გამარჯვებული დააჯილდოვა

    „ჩვენი მასწავლებლები თავიანთი შრომით ამტკიცებენ, რომ არიან ჭეშმარიტად გმირები“ - მიხეილ ჩხენკელმა მასწავლებლის ეროვნული ჯილდოს გამარჯვებული დააჯილდოვა

    2021 წლის მასწავლებლის ეროვნული ჯილდოს მფლობელი ხათუნა რაზმაძე გახდა. გამარჯვებულს ჯილდო საქართველოს განათლებისა და მეცნიერების მინისტრმა მიხეილ ჩხენკელმა გადასცა და წარმატება უსურვა შემდგომ საქმიანობაში. ღონისძიების ფარგლებში მინისტრმა დამსწრე საზოგადოებას სიტყვით მიმართა და პედაგოგებს მასწავლებლის საერთაშორისო დღე მიულოცა.

    მიხეილ ჩხენკელი: „პირველ რიგში, გილოცავთ მასწავლებლის საერთაშორისო დღეს! სასიხარულოა, რომ ტრადიცია გრძელდება და მასწავლებლის ეროვნული ჯილდოს გამარჯვებულის დაჯილდოება საერთაშორისო ზეიმს ემთხვევა - ამ უაღრესად მნიშვნელოვანი პროფესიის წარმომადგენლების აღიარებას. იყო მასწავლებელი - ეს ძალიან დიდი პატივია! ჩვენი მასწავლებლები თავიანთი შრომით ამტკიცებენ, რომ არიან ჭეშმარიტად გმირები. მინდა, ქედი მოვიხარო თითოეული მათგანის წინაშე. მასწავლებლობა უაღრესად პატრიოტული პროფესიაა - პირდაპირი მნიშვნელობით ემსახურება ჩვენი ქვეყნის უკეთეს ხვალინდელ დღეს. შესაბამისად, თითოეული მასწავლებელი საზოგადოების მიერ უნდა იყოს უაღრესად დაფასებული.

    ჭეშმარიტმა მასწავლებელმა უნდა შეძლოს მოსწავლეში ცოდნის სიყვარულის გაღვივება, ინტელექტუალური შრომისადმი პატივისცემის გაჩენა. ეროვნული ჯილდო სწორედ ასეთი შემოქმედებითი აზროვნების მქონე მასწავლებლების დაფასებას უწყობს ხელს. ჩვენი სამინისტრო, პირადად მე, თითოეული მასწავლებლის გვერდით ვარ და დაგეხმარებით ყველა საინტერესო და შემოქმედებითი ინიციატივის განხორციელებაში.

    მართალია, დღეს მხოლოდ ერთი გამარჯვებული გვყავს, მაგრამ, ჩემი ღრმა რწმენით, ვინც ახალგაზრდა თაობის განათლებას ასე თავდადებით ემსახურება, უკვე გამარჯვებული გახლავთ!“

    სიტყვით გამოსვლისას მიხეილ ჩხენკელი ჩვენი დროის გამოწვევას, პანდემიასაც შეეხო და აღნიშნა, რომ მასწავლებლის პროფესიის კეთილშობილება ამ პერიოდში განსაკუთრებით წარმოჩინდა. ის, რომ განათლების სისტემამ წარმატებით შეძლო დისტანციური სწავლების ფორმატზე გადასვლა, სწორედ მასწავლებლების დამსახურებაა. მინისტრის თქმით, თითოეულ მასწავლებელს ყოველდღიურად ფრონტის წინა ხაზზე უწევდა ყოფნა. მიხეილ ჩხენკელმა განაცხადა, რომ პანდემიის დროს არსებულმა გამოწვევებმა დაბადა ახალი შესაძლებლობები. სწორედ ასეთ ვითარებაში შეიქმნა საერთაშორისოდ აღიარებული პროექტი „ტელესკოლა“ - განათლების არხი, რომელიც მუდამ დარჩება და საზოგადოების განათლებას მოემსახურება.

    ეროვნული ჯილდოს გამარჯვებულს პრიზის სახით 10 000 ლარი გადაეცა. კონკურსი 2017 წლის 13 მაისს დაწესდა, საქართველოს განათლებისა და მეცნიერების სამინისტროს, განათლების კოალიციისა და მასწავლებელთა პროფესიული განვითარების ეროვნულ ცენტრს შორის გაფორმებული მემორანდუმის საფუძველზე. აღნიშნული ინიციატივა მასწავლებელთა პოპულარიზაციისკენ მიმართული გლობალური კამპანიის – „The Global Teacher Prize“ ნაწილია, რომელიც მიზნად ისახავს წარმატებული მასწავლებლების გამოვლენას, საზოგადოებისთვის გაცნობას და ამ გზით პროფესიის პრესტიჟის ზრდას.

    „მასწავლებლის ეროვნული ჯილდოს“ კონკურსი საქართველოში უკვე მეხუთედ ტარდება. მისი გენერალური სპონსორია „გუდავაძე-პატარკაციშვილის“ ფონდი. მხარდამჭერები არიან საქართველოს განათლებისა და მეცნიერების სამინისტრო, ილიას სახელმწიფო უნივერსიტეტი, კონსულტაციის და ტრენინგის ცენტრი (ctc), ლიბერთი ბანკი, ტელეკომპანია იმედი, პირველი არხი და მარკეტინგული კომპანია 4MEDIA.

    წაიკითხეთ სრულად