Baby Bag

,,ხარისხიანი განათლებისათვის, გამართულ კურიკულუმთან, ინფრასტრუქტურასა და ტექნოლოგიებთან ერთად, განსაკუთრებული მნიშვნელობა ენიჭება კვალიფიციურ პედაგოგს''

,,ხარისხიანი განათლებისათვის, გამართულ კურიკულუმთან, ინფრასტრუქტურასა და ტექნოლოგიებთან ერთად, განსაკუთრებული მნიშვნელობა ენიჭება კვალიფიციურ პედაგოგს''

საქართველოს განათლების, მეცნიერების, კულტურისა და სპორტის მინისტრმა მიხეილ ჩხენკელმა ეკონომიკური განვითარებისა და თანამშრომლობის საერთაშორისო ორგანიზაციისა (OECD) და განათლების ინტერნაციონალის (EI) მიერ ორგანიზებულ ვირტუალურ საერთაშორისო სამიტში სწავლების პროფესიის შესახებ (ISTP) მიიღო მონაწილეობა. განათლების სფეროში ახალი კორონავირუსის კრიზისის დასაძლევად სხვადასხვა ქვეყნის წარმომადგენლებმა ერთმანეთს გამოცდილება გაუზიარეს და თანამშრომლობის გაძლიერების გზებზე იმსჯელეს.

მიხეილ ჩხენკელი: „მადლობას მოგახსენებთ მნიშვნელოვანი სამიტის ორგანიზებისათვის! დარწმუნებული ვარ, ინფორმაციის გაცვლა, სხვადასხვა ქვეყნების გამოცდილების გაზიარება ძალიან სასარგებლოა და ნაყოფიერ შედეგს გამოიღებს. მინდა აღვნიშნო, რომ ახალმა კორონავირუსმა შექმნა უპრეცედენტო რეალობა ყველა ქვეყნის მთავრობისთვის. მიუხედავად ამისა, საქართველოს განათლების სისტემამ ეფექტურად შეძლო დისტანციურ სწავლებაზე გადასვლა. სამინისტრომ ხელი შეუწყო არამხოლოდ კრიზისული ვითარების დაძლევას, არამედ განათლების მიღების ახალი შესაძლებლობებიც შექმნა“.

მიხეილ ჩხენკელმა სამინისტროს მიერ განხორციელებულ რამდენიმე პროექტზე ისაუბრა, რომლებმაც განათლების მიღების უწყვეტი პროცესი უზრუნველყო. მინისტრმა საზოგადოებრივ მაუწყებელთან თანამშრომლობით შექმნილი პროექტი „ტელესკოლა“ გამოყო, რომელშიც ეროვნული სასწავლო პროგრამით გათვალისწინებულ ტელეგაკვეთილებს სხვადასხვა საგნის გამოცდილი პედაგოგები ატარებენ. ტელეგაკვეთილების დაგეგმვისას სპეციალური საგანმანათლებლო საჭიროების მქონე მოსწავლეების ინტერესიც არის გათვალისწინებული და მათი თარგმნა ჟესტური ენით ხდება.

მინისტრმა ისაუბრა სპეციალურად აბიტურიენტებისთვის შექმნილი პროექტის „ვებსკოლის“ შესახებ, რომელიც მათ ეროვნული გამოცდებისათვის მომზადებაში ეხმარება. იგი ასევე შეეხო ზოგადი განათლების პროექტს „iსკოლა“, რომლის ფარგლებში მოსწავლეებისთვის კომპლექსური საშინაო დავალებების კრებულები 8 სხვადასხვა საგნობრივი მიმართულებით შეიქმნა. აღნიშნული მასალები ვებგვერდზე https://www.el.ge/ არის განთავსებული.

მიხეილ ჩხენკელმა ხაზგასმით აღნიშნა, რომ სხვადასხვა ელექტრონული პლატფორმებისა და პროექტ „ტელესკოლის“ განხორციელებისას განსაკუთრებული ენთუზიაზმი და შემოქმედებითი მიდგომა პედაგოგებმა და პროფესორებმა გამოიჩინეს, რისთვისაც მათ განსაკუთრებული მადლობა გადაუხადა. კრიზისულ სიტუაციაში პედაგოგები დიდი გამოწვევის წინაშე აღმოჩნდნენ, რასაც ძალიან კარგად გაართვეს თავი. მიხეილ ჩხენკელის თქმით, ხარისხიანი განათლებისათვის, გამართულ კურიკულუმთან, ინფრასტრუქტურასა და ტექნოლოგიებთან ერთად, განსაკუთრებული მნიშვნელობა ენიჭება კვალიფიციურ პედაგოგს.

საქართველოს მხრიდან სამიტს საქართველოს პედაგოგთა და მეცნიერთა თავისუფალი პროფკავშირის პრეზიდენტი მაია კობახიძე ესწრებოდა. მინისტრმა მადლობა გადაუხადა საქართველოს პედაგოგთა და მეცნიერთა თავისუფალ პროფკავშირს და აღნიშნა, რომ მათთან მჭიდრო თანამშრომლობა მომავალშიც გაგრძელდება.

ეკონომიკური განვითარებისა და თანამშრომლობის საერთაშორისო ორგანიზაციის (OECD) განათლების დირექტორატის ხელმძღვანელმა ანდრეას შლაიხერმა სხვადასხვა ქვეყნის მაგალითების განხილვისას საქართველო კიდევ ერთხელ გამოყო და დისტანციური სწავლების დანერგვის პროცესში განხორციელებულ პროექტებს დადებითი შეფასება მისცა.

ვირტუალურ საერთაშორისო სამიტში სწავლების პროფესიის შესახებ (ISTP) მონაწილეობა მიიღეს 16 ქვეყნის განათლების მინისტრებმა, მინისტრის მოადგილეებმა, განათლების ექსპერტებმა, პროფკავშირების წარმომადგენლებმა და სხვა დაინტერესებულმა პირებმა.

Momsedu.ge-მ თქვენთვის, მასწავლებლებისთვის შექმნა ახალი სივრცე - „მასწავლებლების სანდო წყარო“, სადაც ყოველდღიურად ქვეყნდება საგანმანათლებლო სფეროს სიახლეები. გადმოდით ბმულზე და მოიწონეთ - „მასწავლებლების სან​დო წყარო“.

„სრულ განაკვეთზე მყოფი მასწავლებლებისთვის ხელფასი დაახლოებით 300 ლარით გაიზრდება“
საქართველოს პრემიერ-მინისტრმა გიორგი გახარიამ მთავრობის სხდომაზე 2019 წელი შეაჯამა და 2020 წლისთვის მთავრობის მიერ შემუშავებულ გეგმაზე ისაუბრა. პრემიერის განცხადებით, არანაირ წარმატებას ჩვენ...

შეიძლება დაინტერესდეთ

​„უსამართლო და დისკრიმინაციულია ასეთი დამოკიდებულება“ - პედაგოგები განათლების სისტემაში ცვლილებებს აპროტესტებენ

​„უსამართლო და დისკრიმინაციულია ასეთი დამოკიდებულება“ - პედაგოგები განათლების სისტემაში ცვლილებებს აპროტესტებენ

რამდენიმე დღის წინ ცნობილი გახდა, რომ ​ნოემბერში დაგეგმილი გამოცდები გადაიდო. ამის მიზეზად განათლების სამინისტრომ კოვიდპანდემია და შექმნილი სიტუაცია დაასახელა. „არსებული ეპიდვითარებისა და ჯანდაცვის სამინისტროს რეკომენდაციების გათვალისწინებით, მასწავლებელთა გამოცდები, ასევე, სპეციალურ მასწავლებელთა გამოცდები 2021-2022 სასწავლო წლის დაწყებამდე გაიმართება,“ - ნათქვამი იყო მათ განცხადებაში. ამის გარდა, აღნიშნულიდან გამომდინარე, ცვლილებები შევიდა მასწავლებლის საქმიანობის დაწყების, პროფესიული განვითარებისა და კარიერული წინსვლის სქემაში.

ერთი მხრივ, გამოცდების გადადებამ და, მეორე მხრივ, ცვლილებებმა პედაგოგთა გარკვეული ნაწილის პროტესტი და გაღიზიანება გამოიწვია. ისინი სამინისტროს ამ გადაწყვეტილებებს სოციალურ ქსელში გამოეხმაურნენ და ამბობენ, რომ მსგავსი მიდგომა არასამართლიანი და დისკრიმინაციულია.
„ყველაფერს ითვალისწინებთ, წამყვანი მასწავლებლები კი შემოგავიწყდით სულ. რატომ აგვიკრძალეთ წინსვლა? ვის რას ვუშავებდით? ჩვენთვისაც მოგეცათ წინსვლის შესაძლებლობა“ - წერს ერთ-ერთი პედაგოგი ​სტატიის კომენტარში, რომელიც ​MomsEdu.ge-მ გამოაქვეყნა.

​ამავე სტატიის ქვეშ სხვა პედაგოგიც აღნიშნავს იმას, რომ მსგავსი ტიპის მიდგომა, რომელიც ახლა აქვს სამინისტროს, უსამართლოა: „წამყვანი მასწავლებლები რამდენ წელს უნდა ველოდოთ კიდევ მენტორის გამოცდას?! უსამართლობის გარდა, კიდევ სხვა სახელი ხომ არ შეეფერება იმ ფაქტს, რომ ერთკრედიტიანი მასწავლებლებიც რაღაც აქტივობებით უკვე წამყვანები არიან და 4-5 საგანში სერტიფიცირებულებიც. მაინც და მაინც მაჩანჩალა უნდა იყო ამ ქვეყანაში, რომ ვინმემ იზრუნოს შენს წარმატებაზე?! რატომ გვაბრკოლებთ იმ ადამიანებს, რომლებმაც კომპეტენცია 10 კრედიტზე დავადასტურეთ, თანაც არა მხოლოდ ჩვენს საგანში! გაუბრალოვდა ყველაფერი, სტიმული გვეკარგება, რომ საქმე კარგად ვაკეთოთ. წარმატებული მასწავლებლების დემოტივირება გინდათ?! ასე აპირებთ განათლების სისტემის საოცნებო გაბრწყინებას?! რა უნდა ასწავლოს ჩვენს შვილებს იმ მასწავლებელმა, რომელმაც ძლივს მოახერხა საგანში ერთი კრედიტის აღება, გინდა წამყვანი იყოს, გინდა მენტორი და გინდა ფარაონი! კარგი რა, ,,გააჩერეთ დედამიწა, ჩავდივარ“.

​პედაგოგები, ამავდროულად, სამინისტროსგან საგამოცდო პროგრამებისა და სახელმძღვანელოების დროულად მიწოდებას ითხოვენ, რათა გამოცდებისთვის მოემზადონ.

​უფროსი და წამყვანი პედაგოგების გარდა პროტესტის გრძნობა გაუჩნდათ სპეციალურ მასწავლებლებსაც, მას შემდეგ, რაც 
​სამინისტრომ ხელფასების მატებასთან დაკავშირებით გაავრცელა ინფორმაციასიახლის თანახმად, 2021 წლის იანვრიდან სტატუსის მქონე ყველა პედაგოგს, ვისაც სრული დატვირთვა (15 საათი) აქვს, ხელფასზე 100 ლარი დაემატება. ვისაც არ აქვთ სრული დატვირთვა, სახელფასო დანამატი პროპორციული დაანგარიშების წესის შესაბამისად გაეზრდება.
​„სპეცმასწავლებლები არსად არც ერთ პირობაში და ცვლილებაში არ მოვიაზრებით?“, „სპეცმასწავლებლებს ისევ ჩაგრავენ. უარი დისკრიმინაციას!“ - წერენ სპეციალური მასწავლებლები სოციალურ ქსელში. შეგახსენებთ, რომ მათ არც ზაფხულში მიეცათ გამოცდაზე გასვლის საშუალება და ახლა კი, გამოცდები საერთოდ გადაიდო.

​სპეციალური მასწავლებლების პროტესტის საპასუხოდ არც განათლების სამინისტროსა და არც მასწავლებლის სახლს განცხადება არ გაუკეთებია. ერთი მხრივ, სამინისტრო წინგადადგმულ ნაბიჯად მიიჩვნევს იმას, რომ სპეციალური მასწავლებლები ჩართეს მასწავლებლის კარიერული წინსვლის სქემაში და საგნის პედაგოგებს გაუთანაბრეს. ამ ცვლილების თანახმად, სპეცმასწავლებლებს პრაქტიკოსის სტატუსი მიენიჭათ და მათ საშუალება აქვთ, რომ სტატუსი საგნობრივი კომპეტენციის დამადასტურებელ გამოცდაზე აიმაღლონ.

​რაც შეეხება ​სქემაში ცვლილებებს და კითხვებს, რომლებიც პედაგოგებს ჰქონდათ ამ თემებთან დაკავშირებით, ჩვენ მასწავლებლის სახლს დავუკავშირდით, თუმცა მათ ჩვენს კითხვებზე არ უპასუხიათ. 

წაიკითხეთ სრულად