ზუგდიდის პირველი საჯარო სკოლის მასწავლებლის მიერ მე-12 კლასელებისადმი მიძღვნილი პოსტი მოქალაქეთა შეშფოთების და სკოლის დისციპლინური კომიტეტის შეკრების მიზეზი გახდა. სწორედ ზუგდიდის პირველი საჯარო სკოლის დისციპლინურმა კომიტეტმა უნდა იმსჯელოს იმის შესახებ, რა სანქცია გატარდება მასწავლებლის მიმართ.
ფეისბუკპოსტში, რომელიც მასწავლებელმა 21 მაისს გამოაქვეყნა და მალევე წაშალა, ნათქვამი იყო, რომ ის სიხარულს განიცდის იმის გამო, რომ გარკვეული მოსწავლეების ნახვა აღარ მოუწევს და ამბობს, რომ ზოგიერთი მათგანის სახელი და გვარის ხსენებაც კი ზარავს:
,,ჩემთვის 26 გამოშვება. უცნაური დღევანდელი მდგომარეობის გამო და არამხოლოდ. არ ირეკება ბოლო ზარი, არ ვწერთ კეთილ სურვილებს მოხატულ პერანგებზე, რაც ყოველთვის გულისამაჩუყებელი იყო და ცრემლებს მგვრიდა. დღეს ეს განცდა არ მაქვს, პირიქით, ვფიქრობ და მიხარია რომ მომავალ სასწავლო წელს მათ გარეშე შევხვდები (რა თქმა უნდა დიდ უმრავლესობას არ ეხება) ზოგიერთი მათგანის სახელის და გვარის ხსენებაც მზარავს. თუმცა მყავს ფავორიტებიც. ჩემს ანდრიას, დათუნას, გიგას, სანდროს, ბადუკას, ვანოს ვუსურვებ წარმატებებს, წინსვლას ცხოვრებაში. თუ 18 წლის არ ვარგიხარ, ვერც 78 წლისას ივარგებ.თქვენ უკვე ხართ 18 წლის, ხართ კარგი ადამიანები, კაცური კაცები, თქვენ იცით პირველ რიგში ეს არის მთავარი და არა, ვთქვათ ქიმიამცოდნეობა. თქვენ შეგიძლიათ თავაწეულებმა იაროთ, სიკეთე და ბედნიერება მოუტანოთ თქვენს ირგვლივ მყოფ ადამიანებს, იარეთ, იარეთ, იარეთ, ამინ!"- წერდა სოციალურ ქსელში პედაგოგი.
„ერთი მასწავლებელი გაზაფხულს ვერ მოიყვანს, მას თანამოაზრე აუცილებლად სჭირდება“
გადაცემაში „პირადი ექიმი - მარი მალაზონია“ ფსიქოლოგ ნინო გოგიჩაძეს პირველი კლასის დამრიგებელმა, რომელმაც წელს დაიწყო სკოლაში მუშაობა, ბავშვებისთვის სადამრიგებლო საათის ფარგლებში საკითხავი რესურსის შესახებ რჩევის მიცემა სთხოვა.
„საკითხავი რესურსი მირჩიეთ, რაც დამეხმარება ბავშვებში მეგობრობისა და ემპათიის გრძნობები გააღვიძოს და ამით მოერიოს ურთიერთდამცირების და უსიყვარულობის სინდრომს,“ - აღნიშნა მასწავლებელმა.
ნინო გოგიჩაძის თქმით, პირველ რიგში მასწავლებელმა უნდა მოძებნოს თანამოაზრე, ვისთან ერთადაც წამოიწყებს ამ საკითხზე მუშაობას, კარგი იქნება თუ ეს თანამოაზრე სკოლის ფსიქოლოგი იქნება, რადგან როგორც ნინო გოგიჩაძე აღნიშნავს, ერთი მასწავლებელი გაზაფხულს ვერ მოიყვანს.
