Baby Bag

საქართველოში ახალი საგანმანათლებლო პროექტი იწყება

საქართველოში ახალი საგანმანათლებლო პროექტი იწყება

საქართველოს განათლების, მეცნიერების, კულტურისა და სპორტის სამინისტროს, გაეროს ბავშვთა ფონდს (UNICEF), განათლების კოალიციასა და სსიპ – განათლების მართვის საინფორმაციო სისტემას შორის ურთიერთთანამშრომლობის მემორანდუმი გაფორმდა. მემორანდუმი ითვალისწინებს ორგანიზაციებს შორის მჭიდრო კოორდინაციითა და თანამშრომლობით, ასევე, დიდი ბრიტანეთის მთავრობის, გუდავაძე-პატარკაციშვილის ფონდის, აღმოსავლეთ-დასავლეთის მართვის ინსტიტუტის (EWMI) ACCESS-სა და „პირველი არხი – განათლების“ მხარდაჭერით, ახალი საგანმანათლებლო პროექტის ამოქმედებასა და ტექნიკურ უზრუნველყოფას.

პროექტის მიზანია სკოლამდელი და ზოგადი განათლების სფეროში განათლების უფლების დაცვისა და ხარისხიანი განათლების უზრუნველყოფა. ამ მიზნით საგანმანათლებლო რესურსები ორი მიმართულებით შეიქმნება.

ზოგადი განათლების – „iსკოლის“ ფარგლებში, პირველიდან მეთორმეტე კლასის ჩათვლით მოსწავლეებისთვის ორგანიზებულ სასწავლო პროცესში ჩართვისათვის შეიქმნება კომპლექსური საშინაო დავალებების კრებულები სხვადასხვა საგნობრივი მიმართულებით, რომლებიც განთავსდება ვებგვერდზე https://www.el.ge/. მოსწავლეებს დისტანციურად შეეძლებათ საჭირო მასალის გაცნობა და დავალებების შესრულება. ონლაინ პლატფორმაზე დავალებების პირველი კრებული ყოველი საგნის/საგნობრივ ჯგუფისათვის ხელმისაწვდომი იქნება მაისის პირველ კვირაში, ხოლო ყოველ მომდევნო კვირას მოსწავლეები მიიღებენ დავალების ახალ კრებულს. აღნიშნული სასწავლო მასალები ხელმისაწვდომი იქნება მასწავლებლებისთვისაც.

რაც შეეხება პროექტის მეორე – სკოლამდელი განათლების კომპონენტს, ის გულისხმობს რეკომენდაციებისა და მრავალფეროვანი აქტივობების სატელევიზიო ფორმატში შეთავაზებას სკოლამდელი დაწესებულებების აღსაზრდელების მშობლებისთვის, რათა მათ ოჯახურ გარემოში განაგრძონ პატარების აღზრდა-განათლება. ასევე, დისტანციური სწავლების პროცესის მართვის მხარდაჭერის მიზნით სკოლების, მასწავლებლებისა და მშობლებისთვის შეიქმნება დისტანციური სწავლების გზამკვლევები.

მემორანდუმს ხელი მინისტრის მოადგილემ ეკა დგებუაძემ, გაეროს ბავშვთა ფონდის წარმომადგენელმა საქართველოში ღასან ხალილმა, განათლების კოალიციის გამგეობის თავმჯდომარემ ირინა ხანთაძემ და სსიპ – განათლების მართვის საინფორმაციო სისტემის ხელმძღვანელმა დიმიტრი ბერიძემ მოაწერეს.

რამდენიმე ხერხი საშინაო დავალების შესწორებისათვის
რამდენიმე ხერხი საშინაო დავალების შესწორებისათვის. ნახეთ ვიდეო და არ დაგავიწყდეთ!!!

შეიძლება დაინტერესდეთ

განათლების, მეცნიერებისა და კულტურის კომიტეტი სკოლებში აკადემიური წლის გამოცხადებას მნიშვნელოვნად ეწინააღმდეგება - გენადი მარგველაშვილი

განათლების, მეცნიერებისა და კულტურის კომიტეტი სკოლებში აკადემიური წლის გამოცხადებას მნიშვნელოვნად ეწინააღმდეგება - გენადი მარგველაშვილი

„ჩვენი კომიტეტი მნიშვნელოვნად ეწინააღმდეგება სკოლებში აკადემიური წლის გამოცხადებას“, - ამის შესახებ პარლამენტის განათლების, მეცნიერებისა და კულტურის კომიტეტის თავმჯდომარემ, გენადი მარგველაშვილმა განაცხადა. როგორც მან პარლამენტის საგანგებო სესიის პლენარულ სხდომაზე სიტყვით გამოსვლისას აღნიშნა, აკადემიური წლის გამოცხადების შემთხვევაში პირველკლასელების მისაღებად სკოლებში ინფრასტრუქტურა არ იქნება.

„მოქალაქეთა მცირე ჯგუფი გამოდის ინიციატივით, მიმდინარე სემესტრის აკადემიურ სემესტრად გამოცხადებასთან დაკავშირებით. მინდა აღვნიშნო, რომ სახელმწიფოს მიერ გატარებულმა ღონისძიებებმა, დისტანციური სწავლების მეთოდების ხელმისაწვდომობის გაზრდა-განვითარებამ განაპირობა ის, რომ სწავლის პროცესი გრძელდება, რაც ეხმარება ზოგადსაგანმანათლებლო დაწესებულებებს, მიაღწიონ ეროვნული სასწავლო გეგმით გათვალისწინებულ მიზნებს. ზემოთ აღნიშნული კი აზრს უკარგავს მიმდინარე სემესტრის აკადემიურ სემესტრად გამოცხადების იდეას. აკადემიური წლის გამოცხადებას ჩვენი კომიტეტი მნიშვნელოვნად ეწინააღმდეგება, უბრალოდ წარმოვიდგინოთ, ამას რა შეიძლება მოჰყვეს გაისისთვის. ჯერ ერთი - პანდემიიდან გამომდინარე, არავინ იცის, 2-3 თვის შემდეგ როგორ გაგრძელდება მოვლენები. იმ შემთხვევაში, თუ სკოლებში ისევ იგივე საზოგადოება გვეყოლება, უბრალოდ, ვეღარ მოვახერხებთ პირველკლასელების რეგისტრაციის დადასტურებასაც კი, რადგან ამისთვის სკოლებში ადგილი და ინფრასტრუქტურა არ გვექნება“, - განაცხადა გენადი მარგველაშვილმა.

განათლების, მეცნიერების და კულტურისა კომიტეტის თავმჯდომარემ განათლების სამინისტროს, სკოლების დირექტორებსა და ამინისტრაციას მოუწოდა, მოწყვლადი ჯგუფებისთვის გააძლიეროს ინდივიდუალური სასწავლო გეგმის პროგრამა:

„ეროვნული სასწავლო გეგმა იმდენად მოქნილია თავისი იდეით, რომ შესაძლებელი გახდება ყველაზე უფრო მოწყვლადი ჯგუფების ჩართვა სასწავლო პროცესში. არსებობენ ისეთი მოსწავლეები, როლებსაც არ აქვთ წვდომა არც ონლაინ გაკვეთილებზე და არც ტელევიზიაზე. ამ შემთხვევაში, მოვუწოდებდი სკოლის დირექტორებს, ადმინისტრაციას, განათლების სამინისტროს, განსაკუთრებული ყურადღება მიაქციონ ასეთ ბავშვებს, რომ ისინი სასწავლო პროცესში ჩართულები იყვნენ,“ - აღნიშნა განათლების, მეცნიერების და კულტურისა კომიტეტის თავმჯდომარემ.

გენადი მარგველაშვილმა მადლობა გადაუხადა მასწავლებლებს და განაცხადა, რომ ამ ერთი თვის განმავლობაში პედაგოგები განსაკუთრებულად შრომობენ, რომ ეროვნული სასწავლო გეგმის მიზნები იქნას მიღწეული.

წაიკითხეთ სრულად