Baby Bag

​საჩუქარი თვითიზოლაციაში მყოფ მოსწავლეებს! - რა არის ლუპი?

​საჩუქარი თვითიზოლაციაში მყოფ მოსწავლეებს! - რა არის ლუპი?

დღეს გვსურს მოგითხროთ ​ლუპის შესახებ.

ლუპი არის ონლაინ საგანმანათლებლო პლატფორმა II – IX კლასელთათვის, რომელიც მოსწავლეებს საშუალებას აძლევს, ქართული, ინგლისური და მათემატიკა სახლის პირობებში ისწავლონ.

სოციალურ ქსელში, ალბათ, თვალს მოკრავდით ლუპის განცხადებას - კომპანია თვითიზოლაციის პერიოდში დისტანციური განათლების ხელშესაწყობად მოსწავლეებს თავისი სერვისის პრემიუმ პაკეტს სრულიად უფასოდ სთავაზობს.

ჩვენ ვესაუბრეთ ლუპის დირექტორს - ირაკლი ჯინჯიხაძეს და მას რამდენიმე კითხვა დავუსვით. გვსურს გაგიზიაროთ ინტერვიუ:

- შეგიძლიათ, მოკლედ აგვიხსნათ, რა არის და როგორ მუშაობს ლუპი?

- ლუპი არის სასწავლო პლატფორმა II – IX კლასელთათვის, რომლებსაც სურთ, სახლში ისწავლონ ქართული, ინგლისური და მათემატიკა. მუშაობის პრინციპი საკმაოდ მარტივია: მოსწავლე რეგისტრირდება, ირჩევს კლასსა და საგანს და იწყებს დღიური დავალებების შესრულებას. დავალებების შესრულებისას მოსწავლე აგროვებს ქულებს, რითიც წინ მიიწევს რეიტინგში. ეს მას მოტივაციის შენარჩუნებაში ეხმარება, რაც სახლში სწავლისას ძალიან საჭიროა.

- რა არის საჭირო იმისთვის, რომ მოსწავლემ ლუპით ისარგებლოს?

- ბევრი არაფერი. საჭიროა კომპიუტერი, ტაბლეტი ან სმარტფონი, ინტერნეტთან წვდომა და საიტზე რეგისტრაცია.

- რით გამოირჩევა ლუპი სხვა სასწავლო პლატფორმებისგან?

- ლუპი არის დაფუძნებული ხელოვნურ ინტელექტზე. საიტის ალგორითმი ისე არის შექმნილი, რომ კურსი ყველა მოსწავლეს ინდივიდუალურად მოერგოს. ყოველი მომდევნო კითხვა დამოკიდებულია წინა კითხვებზე გაცემულ პასუხებზე და დაახლოებით 100 კითხვის შემდეგ ლუპი სრულად პერსონალური ხდება.

გარდა ამისა, ჩვენი ტესტების ბაზა აღემატება 70 000-ს, რაც მოსწავლეს საშუალებას აძლევს, უსასრულოდ (თითქმის) აკეთოს ახალი ტესტები და არ ტკეპნოს ერთი ადგილი.

ჩვენ თითოეული მოსწავლის შრომას ვაფასებთ, ამიტომ 30 დღე სტაბილურად მეცადინეობის შემდეგ მოსწავლეს გადაეცემა დიპლომი სიბეჯითის ნიშნად.

- რატომ გადაწყვიტეთ, რომ სერვისი უფასო გაგეხადათ?

- პანდემიის გამო თვითიზოლაცია უსაფრთხოებისთვის აუცილებელი გახდა და მოსწავლეებს დასჭირდათ დისტანციური განათლების გზა. ზოგმა სკოლამ შეძლო თავისი მოსწავლეებისთვის ონლაინ გაკვეთილების უზრუნველყოფა, თუმცა ბევრი მოსწავლე ამ ვითარებაში საბაზისო განათლების გარეშე დარჩა.

ჩვენ თავი ვალდებულად ჩავთვალეთ, რომ ასეთი მოსწავლეებისთვის ხელი შეგვეწყო არა ფასდაკლებით ან ვაუჩერით, არამედ დისტანციური განათლების სრულიად უფასო და ყველასთვის ხელმისაწვდომი წყაროთი. სწორედ ამიტომ გავხადეთ ლუპის 240-ლარიანი პრემიუმ პაკეტი უფასო 2019-2020 სასწავლო წლის დასრულებამდე.

- ეს თქვენთვის წამგებიანი არ იქნება?

- რა თქმა უნდა, ეს აისახება კომპანიის შემოსავალზე, თუმცა პირდაპირი გაყიდვების გარდა შემოსავლის სხვა წყაროებიც არსებობს. ამ ვითარებაში ჩვენთვის მოსწავლეთათვის განათლების წყაროს შენარჩუნება უფრო პრიორიტეტულია.

- ვისაც აქამდე უკვე გადახდილი ჰქონდა ლუპის პრემიუმ პაკეტის ღირებულება, მათ რამე შეღავათი ეკუთვნით?

- მათ, ვისაც ლუპის პრემიუმ პაკეტი უკვე შეძენილი ჰქონდათ, პაკეტით სარგებლობის ვადა 3 თვით გაუხანგრძლივდათ.

დასარეგისტრირებლად და მეტი ინფორმაციის მისაღებად ეწვიეთ ლუპის ვებ-გვერდს - Lupi.Ge
R.

#დარჩისახლში და ისწავლეთ დისტანციურად.

შეიძლება დაინტერესდეთ

„იმ შემთხვევაში, თუ სკოლაში ინფექციის იდენტიფიცირება მოხდება, სკოლა ვალდებულია მიმართოს ადგილობრივი ჯანდაცვის ცენტრს,“ - ეკატერინე დგებუაძე

„იმ შემთხვევაში, თუ სკოლაში ინფექციის იდენტიფიცირება მოხდება, სკოლა ვალდებულია მიმართოს ადგილობრივი ჯანდაცვის ცენტრს,“ - ეკატერინე დგებუაძე

​​საქართველოს განათლების, მეცნიერების, კულტურისა და სპორტის მინისტრის პირველმა მოადგილემ ეკატერინე დგებუაძემ იმ რეკომენდაციების შესახებ ისაუბრა, რომელთა დაცვა სკოლებს ზოგადსაგანმანათლებლო დაწესებულებებში სასწავლო პროცესის დაწყების შემდეგ ევალებათ:

„სკოლებს ეძლევათ სრული თავისუფლება იმისთვის, რომ თავიანთი საჭიროებიდან, ინფრასტრუქტურიდან გამომდინარე დააორგანიზონ სასწავლო პროცესი. წესებთან დაკავშირებით მნიშვნელოვანი შესასრულებელი ღონისძიება არის ის, რომ მოსწავლეებს შორის ერთ მეტრიანი დისტანცია უნდა არსებობდეს. მერხები უკვე ისეა განთავსებული, რომ მოსწავლეები ერთი მეტრის რადიუსზე არიან ერთმანეთისგან დაშორებული. ​სასწავლო პროცესის დაწყებამდე უნდა მოხდეს სიცხის გაზომვა. იმ შემთხვევაში, თუ სიცხე დაუფიქსირდება მოსწავლეს, ის გადადის საიზოლაციო ოთახში, სადაც ხდება ტემპერატურის გადამოწმება. თუ მას რამდენჯერმე დაუფიქსირდა ტემპერატურა, ინფორმაციას აწვდიან მშობლებს. საჭიროების შემთხვევაში გადამისამართება ხდება 112-ში.“

ეკატერინე დგებუაძის თქმით, წესებისა და რეკომენდაციების დაცვა სკოლის ადმინისტრაციის პასუხისმგებლობაა:

„საინფორმაციო კამპანიის კუთხითაც გადაიდგა ნაბიჯები. დაიბეჭდა პოსტერები, რომლებიც გაკრულია სკოლებში. თვალსაჩინოა ყველა ის ნაბიჯი და აქტივობა, რომელიც მოსწავლემ მასწავლებელთან ერთად უნდა განახორციელოს. ეს არის უკვე ​სკოლის ადმინისტრაციის პასუხისმგებლობა, როგორ დაიცავს, როგორ მიჰყვება ამ წესებს. ამ ყველაფერს მოჰყვება მონიტორინგი. გარდა ამისა, ერთ-ერთი მნიშვნელოვანი საკითხი, რომელზეც მინდა მშობლებს ინფორმაცია მივაწოდო, ეს არის სერვისი, რომელიც განათლების სამინისტრომ შეიმუშავა. იმ მშობლებს, რომლებსაც ეშინიათ, აქვთ საშუალება განაცხადი გააკეთონ, დაწერონ წერილი ან მეილიდან სკოლის ადმინისტრაციას მესიჯი გაუგზავნონ. ამ მომენტიდან სკოლა დაიწყებს კონკრეტული მოსწავლისთვის დისტანციურ ფორმატში საგაკვეთილო პროცესის ორგანიზებას. თუ მშობელს უნდა, რომ მოსწავლე დარჩეს დისტანციური სწავლების ფორმატში, ის მოსწავლე დარჩება ამ ფორმატში.“

ეკატერინე დგებუაძემ აღნიშნა, რომ სკოლაში კოვიდ-19-ის იდენტიფიცირების შემთხვევაში, სკოლამ ადგილობრივი ჯანდაცვის ცენტრს უნდა მიმართოს:

„იმ შემთხვევაში, ​თუ სკოლაში ინფექციის იდენტიფიცირება მოხდება, სკოლა ვალდებულია მიმართოს ადგილობრივი ჯანდაცვის ცენტრს. სწორედ ცენტრის რეკომენდაციის საფუძველზე მიიღება გადაწყვეტილება, სკოლა გადავიდეს სრულად დისტანციურ სწავლებაზე, თუ კონკრეტული კლასი გადავა დისტანციური სწავლების ფორმატზე. რეკომენდაციაა, რომ თუ სკოლას დასჭირდა, შაბათი დღე გამოიყენოს სასწავლო დღედ. ამ შემთხვევაში ესეც დასაშვებია. მუნიციპალური ტრანსპორტი შეზღუდულია, შესაბამისად ჩვენი რეკომენდაცია იქნება, რომ შაბათის სასწავლო დღედ გამოყენების შემთხვევაში, დისტანციურ ფორმატში ჩაატარონ გაკვეთილები.“

„მნიშვნელოვანია, რომ როდესაც ბავშვები სკოლაში დაბრუნდებიან, მასწავლებელმა მოახდინოს მათი აკადემიური მიღწევების შეფასება საკლასო ოთახის დონეზე. უნდა მოხდეს მოსწავლის შეფასება, რადემნად ძლევს იმ მიზნებს, რომლებიც მასწავლებელს აქვს დასახული. თუ გამოწვევები არსებობს, სკოლა ვალდებულია მოსწავლისთვის შეიმუშავოს ინდივიდუალური გაკვეთილები. ამ შემთხვევაში ​მხარი უნდა დავუჭიროთ მოსწავლეს, დავეხმაროთ, რომ ის არ იყოს მოწყვეტილი სასწავლო პროცესისგან,“ - აღნიშნულ თემაზე ეკატერინე დგებუაძემ საქართველოს პირველი არხის გადაცემაში „ახალი დღე“ ისაუბრა.

წყარო:​ „ახალი დღე“

წაიკითხეთ სრულად