Baby Bag

სახელმწიფომ განათლების მიმართულებით უპრეცედენტო მასშტაბის რეფორმების განხორციელება დაიწყო

სახელმწიფომ განათლების მიმართულებით უპრეცედენტო მასშტაბის რეფორმების განხორციელება დაიწყო

პრემიერ-მინისტრობის კანდიდატთან მარიამ ჯაში საბავშვო ბაღების თანამშრომლების შრომითი პირობების გაუმჯობესების საკითხს აყენებს. 

განათლების, მეცნიერებისა და კულტურის კომიტეტის თავმჯდომარემ მარიამ ჯაშმა კითხვით მიმართა საქართველოს პრემიერ-მინისტრობის კანდიდატს გიორგი გახარიას, თუ როგორია მისი ხედვა განათლების სისტემაში მიმდინარე მასშტაბური რეფორმის შემოდგომ განხორციელებასთან დაკავშირებით.

კომიტეტის თავმჯდომარემ აღნიშნა, რომ სახელმწიფომ დაიწყო უპრეცედენტო მასშტაბის რეფორმების განხორციელება განათლების მიმართულებით, როგორც ადამიანური კაპიტალის განვითარების, ასევე შრომითი უფლებების გაუმჯობესების კუთხით. მან ასევე ხაზი გაუსვა განათლების სექტორში დაფინანსების მნიშვნელოვნად გაზრდის გეგმებს, რომელთა მიხედვითაც 2022 წლიდან მთლიანი შიდა პროდუქტის 6% და სახელმწიფო ბიუჯეტის 25% მიმართული იქნება სწორედ განათლების რეფორმებისა და პროგრამების მხარდასაჭერად.

მარიამ ჯაშის შეფასებით ეს არის ისტორიული გადაწყვეტილება, რომელსაც სხვადასხვა მუნიციპალიტეტში გამართული შეხვედრების ფორმატში დადებითი გამოხმაურება აქვს როგორც აკადემიური და პედაგოგიური კორპუსის წარმომადგენლებში, ასევე ფართო საზოგადოებაში.

კომიტეტის თავმჯდომარემ ასევე აღნიშნა, რომ სხვადასხვა ქალაქსა თუ სოფელში შეხვედრებისას გამოიკვეთა ჩვენი საზოგადოების მოლოდინი, რომ საბავშო ბაღებშიც, სკოლამდელი აღზრდის დაწესებულებებშიც გაუმჯობესდეს აღმზრდელებისა და თანამშრომლებისათვის შრომითი პირობები.

შეიძლება დაინტერესდეთ

განათლების სამინისტრომ სკოლებისთვის რეკომენდაციები განაახლა

განათლების სამინისტრომ სკოლებისთვის რეკომენდაციები განაახლა

15 თებერვლიდან საქართველოს მთელ ტერიტორიაზე, მათ შორის, თბილისში, რუსთავსა და ქუთაისში, სასწავლო პროცესის საკლასო ოთახებში გაგრძელებასთან დაკავშირებით საქართველოს განათლების, მეცნიერების, კულტურისა და სპორტის სამინისტრომ სკოლებისთვის რეკომენდაციები განაახლა.

უწყების ცნობით, აღნიშნული რეკომენდაციები, ჯანდაცვის სამინისტროს მიერ დადგენილ შესაბამის რეგულაციებთან ერთად, სამინისტრომ ქვეყნის მასშტაბით, ყველა ზოგადსაგანმანათლებლო დაწესებულების ადმინისტრაციას მიაწოდა. თავის მხრივ, სკოლები მოკლე ტექსტური შეტყობინებისა და ელექტრონული ფოსტის მეშვეობით უზრუნველყოფენ მოსწავლეთა მშობლების ინფორმირებას. ამ გზით ყველა მხარეს ექნება ინფორმაცია იმის თაობაზე, თუ რა ღონისძიებებს ახორციელებს სკოლა Covid-19-ის პანდემიის გამოწვევების საპასუხოდ, როგორც სასწავლო პროცესის ორგანიზებასთან, ასევე სკოლაში არსებულ სანიტარულ-ჰიგიენურ ნორმებთან დაკავშირებით.

„სკოლებში უსაფრთხო საგანმანათლებლო გარემოს შექმნის მიზნით, სამინისტროს ინიციატივით, სკოლებს მშობლებთან კომუნიკაციის სტრატეგიის შემუშავება და დამტკიცება დაევალა. ეს საშუალებას მისცემს მშობლებს, ყველა ხელმისაწვდომი საკომუნიკაციო საშუალებით (სკოლის Facebook-ის გვერდი, ელფოსტა, მოკლე ტექსტური შეტყობინება, TEAMS-ის პროგრამა, ბანერები, საინფორმაციო შეხვედრები), სისტემატურად მიიღონ ინფორმაცია ისეთ მნიშვნელოვან საკითხებზე, როგორიცაა:

  • სკოლის სპეციალური აღჭურვილობებით, დეზობარიერებით, სადეზინფექციო საშუალებებით, პირბადეებითა და უკონტაქტო თერმომეტრებით უზრუნველყოფა
  • სკოლის მოვლა-პატრონობისა და დალაგება-დასუფთავების მიზნით გატარებული ღონისძიებები
  • სკოლაში სველი წერტილების მდგომარეობა
  • საკლასო ჯგუფების ცვლებში განაწილება, მიმდინარე საგაკვეთილო ცხრილი და სსსმ მოსწავლეებისთვის რესურს ოთახით სარგებლობის განრიგი
  • სკოლის ეზოსა და შენობაში მოსწავლეთა ნაკადების შესვლის, გასვლისა და გადაადგილების ორგანიზება
  • თერმოსკრინინგის უზრუნველყოფა
  • სკოლის პერიმეტრზე პირბადის ტარებასთან დაკავშირებული მოთხოვნები
  • დისტანციური სწავლების მოთხოვნა საჯარო სკოლის მოსწავლეებისთვის
  • სკოლის პერსონალის სავალდებულო ტესტირება
  • მშობლებთან კომუნიკაციისთვის გამოყოფილი დრო და ფორმატი.


​სამინისტრო მოუწოდებს მშობლებს, ყურადღებით გაეცნონ სკოლის მიერ მიწოდებულ ინფორმაციას და ზედმიწევნით დაიცვან შესაბამისი რეკომენდაციები:

  • სკოლაში წასვლამდე აკონტროლონ მოსწავლის ტემპერატურა
  • ცხელების ან სხვა სიმპტომების გამოვლენისთანავე დროულად მიაწოდონ სკოლას ინფორმაცია
  • უზრუნველყონ მოსწავლის დროული გამოცხადება სკოლაში
  • ცხელების დაფიქსირების შესახებ შეტყობინების მიღებისთანავე, უმოკლეს ვადაში უზრუნველყონ მოსწავლის სკოლიდან წაყვანა
  • დაესწრონ სკოლის მიერ ორგანიზებულ საინფორმაციო ონლაინ შეხვედრებს.


​აღსანიშნავია, რომ მოსწავლეთა მშობლებს კვლავ ეძლევა შესაძლებლობა, გააკეთონ არჩევანი დასწრებით სწავლებასა და დისტანციური სწავლების ფორმას შორის. აღნიშნული მიდგომა მხოლოდ თბილისის, ქუთაისის, რუსთავის, ზუგდიდის, თელავის, ზესტაფონის, გარდაბნის, ფოთის, მარნეულის, ბათუმის, ქობულეთისა და გორის საჯარო სკოლებს შეეხება.

ამასთან, მთელი ქვეყნის მასშტაბით, სამინისტრო შესაძლებლობას აძლევს რისკჯგუფში მყოფ მასწავლებლებს, შესაბამისი სამედიცინო დასკვნის საფუძველზე, სკოლის ადმინისტრაციაში განაცხადონ მუშაობის დისტანციურ ფორმატში გაგრძელების თაობაზე. ასეთ შემთხვევაში სკოლას აქვს შესაძლებლობა, კონკრეტული საგანი გადაიტანოს დისტანციურ ფორმატში, ან პედაგოგი სხვა მასწავლებლით ჩაანაცვლოს. მნიშვნელოვანია, რომ აღნიშნული პროცესი მასწავლებლის უფლებების გათვალისწინებითა და მასთან შეთანხმებით წარიმართოს.

საქართველოს მასშტაბით სკოლებში უკვე მიმდინარეობს მასწავლებელთა და სკოლის ადმინისტრაციული პერსონალის მინიმუმ 20%-ის სავალდებულო სისტემატური ტესტირება, 2 კვირაში ერთხელ ჯანდაცვის სამინისტროსთან ერთად შემუშავებული პროტოკოლის საფუძველზე.

აღსანიშნავია, რომ ძალაში რჩება 2020-2021 სასწავლო წლის დასაწყისში სამინისტროს მიერ გაცემული რეკომენდაციები სასწავლო პროცესის ორგანიზებასთან დაკავშირებით. კერძოდ, სკოლას შეუძლია თავად განსაზღვროს: გაკვეთილის ხანგრძლივობა, საგაკვეთილო პროცესის დაწყების დრო საფეხურების/კლასების მიხედვით, მოქნილად დაგეგმოს ცვლები, მოსწავლეების უსაფრთხოებისა და სკოლის ინფრასტრუქტურის გათვალისწინებით დაგეგმოს შერეული სწავლების საკუთარი მოდელი, შერეული მოდელის დაგეგმვისას I-IV კლასის მოსწავლეებისთვის სავალდებულოდ განსაზღვროს ფიზიკურად სასკოლო სივრცეში გაკვეთილების ჩატარება“, - წერია განათლების სამინისტროს მიერ გავრცელებულ ინფორმაციაში.

წაიკითხეთ სრულად