„ყველას გილოცავთ ბარბარობას, ეს არის უდიდესი დღესასწაული. „დიდ ხარ შენ, უფალო, და საკვირველ არიან საქმენი შენნი და ვერვინ შემძლებელ არს მადლის მიცემად საკვირველებათა შენთა“. წმინდა ბარბარე არის მაგალითი მტკიცე სარწმუნოებისა, ერთგულებისა, ქრისტიანული ერთგულებისა, - ამის შესახებ სრულიად საქართველოს კათოლიკოს-პატრიარქმა ილია მეორემ განაცხადა.
„პრობლემები მუდამ ყოფილა და იქნება მშობლებსა და შვილებს შორის; და აი, დღეს ჩვენ შევთხოვთ უფალს, რომ გახსნას გული და გონება ჩვენი ახლაგაზრდებისა, ჩვენი ხალხისა. ჩვენ დღეს ვფიქრობთ, ეს რაც ხდება - ამდენი მსხვერპლი - ეს სასჯელია, თუ ლოცვა-კურთხევა ღვთისა? არაფერი ხდება ღვთის გარეშე. შევთხოვთ უფალს, რომ უფალმა ძალი ერსა თვისსა მოსცეს, უფალმან დალოცოს ერი თვისი მშვიდობით! „ითხოვდით და მოგეცეს თქუენ; ეძიებდით და ჰპოვოთ; ირეკდით და განგეღოს თქუენ“. და აი, დღეს ჩვენ ვითხოვთ მშვიდობას, სიხარულს, ქრისტიანული რწმენის განმტკიცებას, სიმშვიდეს გულსა და გონებაში, სულში და დარწმუნებული ვართ, რომ ღმერთი შეისმენს ჩვენს ლოცვას“, - აღნიშნა პატრიარქმა.
მან მრევლს ახალი ინიციატივაც გააცნო:
„გუშინ დაიწერა მოკლე ლოცვა, სადაც ვთხოვთ უფალს, რომ სიმშვიდე მოგვცეს, დაამშვიდოს ეს ცხოვრება. ამის გარდა, ჩვენ გადავწყვიტეთ, რომ ჩვენმა ბავშვებმა, ახალგაზრდებმა დაწერონ ლოცვები, თხოვნები, არ შეიძლება, რომ ღმერთმა არ შეისმინოს ჩვენი შვილების ლოცვები. რომ დაწერთ ამ ლოცვებს, თხოვნებს, წერილებს, როგორც საკუთარ მშობელს, ისე უნდა მიმართოთ მამასა, ძესა და სულსა წმინდასა და გამომიგზავნეთ მე. გადაწყვეტილი მაქვს, რომ როცა შეგროვდება საკმაოდ ბევრი, გამოვცეთ წიგნად“, - განაცხადა ილია მეორემ.
საქართველოს კათოლიკოს-პატრიარქის მიერ დაწერილი ლოცვა მეუფე დანიელმა წაიკითხა:
„მამაო ჩვენო, ღმერთო, აბრაამისა, ისააკისა და იაკობისა, დიდება და მადლობა შენ!
უფლისა ჩვენისა იესო ქრისტეს სახელით, მისი მეოხებითა და შუამდგომლობით გევედრებით, გარდამოიხილე ზეცით, მოწყალეო, შეგვინდე შეცოდებანი ჩვენნი, მოგვეც ძალა ბოროტის დათრგუნვისა და სიმართლის გზით სვლისა. მოგვეც ძალა შენი მორჩილებისა!
დაგვილოცე ოჯახები, შვილები და შვილიშვილები, ჩვენი ახლობლები, დაგვილოცე საქართველო და მთელი მსოფლიო.
შენნი ვართ, გვაცხოვნე ჩვენ!
შეგთხოვთ, უფალო, დაამშვიდე ცხოვრება ჩვენი, გვიხსენ ჭირთა და სენთაგან და მრავაფერთა განსაცდეთაგან.
შეგთხოვთ, უფალო, არა უგულებელს-გვყო ჟამსა მას მეორედ მოსვლისა შენისასა, არამედ ვიხარებდეთ ორსავ სოფელსა შინა და მარად გადიდებდეთ შენ - მამასა და ძესა და წმინდასა სულსა, ამინ!“
პატრიარქის თქმით, ეს ლოცვა მრევლმა უნდა იკითხოს სადაც არ უნდა იყოს - ტაძარში, სახლში თუ სამსახურში:
„ღმერთმა დალოცოს ჩვენი ხალხი, მთელი მსოფლიო, ღმერთმა ისმინოს ლოცვისა ამის. ეს ლოცვა იქნება ტაძრებში და სადაც არ უნდა იყოთ, - ტაძარში, სახლში თუ სამსახურში, - ეს ლოცვა წაიკითხეთ და ღმერთი შეისმენს თქვენს ლოცვას. დალოცვილი იყავით! ვულოცავ სრულიად საქართველოს და მთელ მსოფლიოს ბარბარობას, წმინდა ბარბარე იყოს მფარველი ჩვენი შვილებისა, დალოცვილი და გახარებული იყავით! - განაცხადა პატრიარქმა.
წაიკითხეთ სრულად
