Baby Bag

„ასწავლეთ ბავშვებს თვითშეფასებები და ენდეთ მათ ნიშნებს,“- შალვა ამონაშვილის რჩევები პედაგოგებს

„ასწავლეთ ბავშვებს თვითშეფასებები და ენდეთ მათ ნიშნებს,“- შალვა ამონაშვილის რჩევები პედაგოგებს

აკადემიკოსმა შალვა ამონაშვილმა მასწავლებლებს ურჩია, რომ ბავშვებს თვითშეფასების უნარები განუვითარონ:

„ასწავლეთ ბავშვებს თვითშეფასებები. რატომ უნდა ვიჩქაროთ, რომ ავიღოთ კალამი და ჩავუწეროთ ბავშვს რაღაც ნიშნები? ჩვენ კი არ შევაფასოთ, ვუთხრათ, ვკითხოთ, თვითონ როგორ შეაფასებდა ამ პასუხს. საკონტროლოს რომ დაწერს, ვუთხრათ: „გადაიკითხე, გაასწორე შეცდომები და აღარ ჩაგითვლი იმ შეცდომას შეცდომად. წაიკითხე შენ, ხომ გაქვს სინდისი, ნამუსი, არ გეჩხუბები, თვითონ დაიწერე ის ნიშანი, რაც გეკუთვნის.“ რატომ გვეშინია ამის ჩვენ? ამით ხომ ჩვენს ბავშვებს თვალს გავუხელთ საკუთარი თავის მიმართ, სინდისს გავუღვიძებთ, სიმართლეს ვასწავლით.

თუ ვინმემ ეს არ გამოიყენა კეთილად, ამის არ შეგვეშინდეთ. ბავშვების უმრავლესობა ამას კეთილად გამოიყენებს. ასწავლეთ ბავშვებს ასეთი თვითშეფასებები და ენდეთ მათ ნიშნებს. ჩვენს პრაქტიკაში, საქართველოში ძლიერი ექსპერიმენტული კვლევები მიმდინარეობდა. აქ ასეთი პრაქტიკა გვქონდა, რომ არ გვქონდა ნიშანი, გვქონდა შეფასება სიტყვით. როდესაც ბავშვი ასე აანალიზებდა თავის მოქმედებებს, ხედავდა შეცდომებს, დასკვნებიც გამოჰქონდა და შეცდომა გასწორებული იყო არა რვეულში, არამედ ფსიქიკაში. ვთქვათ, ბავშვს უნდა დაეწერა საკუთარი თავისთვის 9 ქულა და დაიწერა 10, რა მოხდა მერე?! ზოგჯერ ჩვენც ვუწერთ ხოლმე ბავშვებს ცოტა აწეულ ნიშანს, რომ იქნებ წაქეზდესო. მივენდოთ ბავშვს. როდესაც საკუთარ თავში ნაკლს მონახავენ ბავშვები, გაიხარეთ, ხელი ჩამოართვით, გაიკვირვეთ. ვინც ნაკლი იცის, ის წინ მიდის. შეცდომებზე ვსწავლობთო, ნათქვამია. შეცდომებზე მართლა ვისწავლოთ ჩვენ და არ ვინერვიულოთ შეცდომების გამო,“ - აღნიშნა შალვა ამონაშვილმა.

წყარო: ​„ამონაშვილის აკადემია“

შეიძლება დაინტერესდეთ

რა საფრთხეს შეიცავს წამწამების დაგრძელება-გახშირების პროცედურები?

რა საფრთხეს შეიცავს წამწამების დაგრძელება-გახშირების პროცედურები?

წამწამების დაგრძელებისა და გახშირების პროცედურებს ქალბატონები საკმაოდ ხშირად მიმართავენ. აღნიშნული პროცედურების დახმარებით წამწამების სიგრძე და მოცულობა მნიშვნელოვნად იცვლება, რაც თვალებს უფრო მისტიკურ და მომხიბლავ ელფერს სძენს. მიღებული შედეგის შესანარჩუნებლად ქალბატონები პროცედურებს რამდენიმე თვეში ერთხელ იტარებენ.

წამწამების დაგრძელება-გახშირების პროცედურა სხვა კოსმეტიკური ჩარევების მსგავსად, სრულად უსაფრთხო არ არის და მას გარკვეული უკუჩვენებები აქვს. როდესაც წამწამების დაგრძელებას ან გახშირებას ცდილობთ, პროცედურა ხარისხიან ესთეტიკის ცენტრში უნდა ჩაიტაროთ. მოსალოდნელი რისკების თავიდან ასაცილებლად და აღნიშნული პროცედურის უფრო ჯანსაღი ალტერნატივების შესახებ ინფორმაციის მოსაპოვებლად, ყურადღებით გაეცანით ჩვენს სტატიას.

წამწამების დაგრძელება-გახშირების გვერდითი ეფექტები

წამწამების დაგრძელება-გახშირების პროცედურა საკმაოდ ახალია და მისი ჩატარებისას გამოვლენილი გვერდითი ეფექტების შესახებ ინფორმაცია საკმაოდ მწირია, თუმცა პროცედურის ჩატარების შემდგომ გამოხატული გვერდითი ეფექტების შესახებ უკვე საკმაოდ დიდი ცოდნა დაგროვდა.

ყველაზე დიდი საფრთხე, რომელიც წამწამების დაგრძელება-გახშირების პროცედურას ახლავს კანის გაღიზიანებაა. მართალია, თვალის ირგვლივ კანს კოსმეტოლოგები სპეციალური დამცავი საფენით ფარავენ, მაგრამ კერატინის წებოს კანზე მოხვედრის რისკი მაინც მაღალია. მშრალი თვალის, მგრძნობიარე კანისა და ალერგიის პრობლემა თუ გაქვთ, პროცედურაზე გამოყენებული ქიმიური ნაერთები თქვენთვის განსაკუთრებით საფრთხის შემცველია.

წამწამების დაგრძელება-გახშირების პროცედურის გვერდითი ეფექტები შემდეგია:

  • კანზე წყლულების გაჩენა
  • კანის სიწითლე
  • თვალების სიმშრალე
  • ცრემლდენა თვალებიდან
  • ანთებითი პროცესების განვითარება
  • მტვრევადი და დაზიანებული წამწამები

პროცედურის დროს კანის დაწითლება, გაღიზიანება და წყლულის გაჩენა ხშირად ხდება. თქვენ რქოვანას დაზიანების საფრთხეც გემუქრებათ, თუ პროცედურის შედეგად გაღიზიანებულ თვალს მოისრესთ და ან მოულოდნელად იტკენთ.

პროცედურის დროს გამოყენებული ქიმიური ნაერთები წამწამებს აზიანებს და შესაძლოა, დროებით მათ გარეშეც დარჩეთ.

რა უნდა იცოდეთ წამწამების დაგრძელება-გახშირების პროცედურის შესახებ?

პროცედურის დაწყებამდე აუცილებლად უნდა მოიხსნათ ლინზები, თუ მათ ატარებთ. უნდა დარწმუნდეთ, რომ ქუთუთოები და წამწამები კარგად გაქვთ გასუფთავებული, მათზე მაკიაჟის ან თვალების გამწმენდი სითხის კვალი არ უნდა იყოს დარჩენილი.

მართალია, წამწამების დაგრძელება-გახშირების პროცედურას უსაფრთხოდ მოიხსენიებენ, მაგრამ მისი ჩატარებისაც ქარხნული წარმოების კერატინი გამოიყენება. აღნიშნული პროცედურის ჩატარებისას ხშირად წამწამების შეღებვაც ხდება, რისთვისაც დამატებითი ქიმიური ნაერთები გამოიყენება. აღნიშნული პროცედურების ჩატარება სარისკოა, თუ თქვენ გაქვთ:

  • თვალის ალერგიები
  • თვალის ინფექციები
  • მგრძნობიარე კანი
  • ქრონიკული თვალის სიმშრალე
  • ცრემლდენა თვალიდან

რომელი ალტერნატიული პროცედურების გამოყენებით არის შესაძლებელი წამწამების დაგრძელება-გახშირება?

წამწამების დაგრძელება-გახშირების პროცედურაზე გვერდითი ეფექტები თუ გივლინდებათ, შემდეგი ალტერნატივები სცადეთ:

  • წამწამების დამხვევი - აღნიშნული მოწყობილობა შეგიძლიათ ყოველდღიურად გამოიყენოთ. ის წამწამებს უფრო ესთეტიკურს და ლამაზს ხდის. დამხვევის ეფექტი სახის დაბანის შემდეგ ქრება.
  • ტუში - შეგიძლიათ ისეთი ტუში შეიძინოთ, რომელსაც წამწამების დაგრძელებისა და დახშირების ეფექტი აქვს. ტუშის ფერი თქვენი თვალის ფერს შეუხამეთ. უპირატესობა წყალგამძლე კოსმეტიკას მიანიჭეთ.
  • წამწამების მოვლის პროცედურები - კოსმეტიკა ყოველდღიურად სრულფასოვნად მოიშორეთ თვალიდან. წამწამების დაგრძელება-გახშირების პროცედურები იშვიათად, მხოლოდ აუცილებლობის შემთხვევაში ჩაიტარეთ.

თვალის, კანისა და წამწამების დაზიანების რისკის თავიდან ასაცილებლად გირჩევთ, ტუში და წამწამების დამხვევი მუდამ თან ატაროთ, ამგვარად კომპლექსური პროცედურების ჩატარების საჭიროება აღარ გექნებათ.

მომზადებულია ​healthline.com - ის მიხედვით

თარგმნა ია ნაროუშვილმა 

წაიკითხეთ სრულად