Baby Bag

„ჩემი მასწავლებელი არასდროს არ გვასწავლიდა იმიტომ, რომ ლექსი ზეპირად გვეთქვა,“- შალვა ამონაშვილის რჩევები პედაგოგებსა და მშობლებს

„ჩემი მასწავლებელი  არასდროს არ გვასწავლიდა იმიტომ, რომ ლექსი ზეპირად გვეთქვა,“- შალვა ამონაშვილის რჩევები პედაგოგებსა და მშობლებს

აკადემიკოსმა შალვა ამონაშვილმა ჰუმანური პედაგოგიკის მნიშვნელობის შესახებ ისაუბრა:

„კავკასიის მთები არ მოგწონთ? ამ ორ მთას შორის რომ პატარა მთაა, ის გოგებაშვილია. გოგებაშვილის მწვერვალი დავარქვი. როგორ ცოცხლდებიან მთები?! გახედავ და ჩემი მთებია. ჩემი პროფესიაა ბავშვების სიყვარული, ანუ პედაგოგიკა. მიყვარს ბავშვების აღზრდის შესახებ ფიქრი. მთელი ჩემი ცხოვრება ამას ვემსახურები. ეს ყველაფერი აქ დაიწყო, თბილისში. 60-70-80-იან წლებში ვქმნიდით ამ პედაგოგიკას პირველ ექსპერიმენტულ სკოლაში და საქართველოს ბევრ სკოლაში.

არ გამოდგება ყვირილი, დასჯა, აკრძალვები. ეს ბავშვები არიან ახალი თაობის ბავშვები. მათ სინათლის ბავშვები ჰქვიათ, ვარსკვლავის ბავშვები ჰქვიათ. ბავშვი, როდესაც გამგები გვერდით არ ჰყავს, ეძებს გამოსავალს. ხანდახან უნდა, რომ დაგვსაჯოს, გადაყლაპავს რაღაც აბებს, ასე ხდება სუიციდები. ჩვენ ვართ ბიძგის მიმცემები ამ ამბავში. შეუყვარდა მეექვსე კლასელს მეცხრე კლასელი, არ შედგა ეს, წავიდა გოგონა და მოიკლა თავი. ვიღაცას რომ ეთქვა ლიტერატურის მასწავლებელს, რომ სიყვარული ასეთია, გაუძელით, ბავშვებო. თქვენც შეგიყვარდებათ, განა მარტო იმან და იმან შეიყვარეს ერთმანეთი რომანში?!

საქართველოში მასწავლებელს არ აქეზებენ, რომ შემოქმედი იყოს. წავიკითხავთ რაღაც რომანს, მშვენიერი ქართველი მწერლები გვყვანან და უნდა გადმოვცეთ შინაარსი. ვის უნდა ეს შინაარსები?! გადმოსცა მოსწავლემ შინაარსი. მერე რა?! როდესაც ამაზე ვალაპარაკობ, სულ ჩემი მასწავლებელი მახსენდება, ვენაცვალე იმის სულს, ვარვარა ვარდიაშვილი. არასდროს არ გვასწავლიდა იმიტომ, რომ ლექსი ზეპირად გვეთქვა. ახლაც არიან ასეთი მასწავლებლები, რა თქმა უნდა,“- აღნიშნა შალვა ამონაშვილმა.

წყარო: ​„ამონაშვილის აკადემია“

შეიძლება დაინტერესდეთ

„დაძინებამდე ლოგინში გატარებული დრო სასურველია, არ აღემატებოდეს ნახევარ საათს,“- ბავშვთა ნევროლოგი თამარ ედიბერიძე

„დაძინებამდე ლოგინში გატარებული დრო სასურველია, არ აღემატებოდეს ნახევარ საათს,“- ბავშვთა ნევროლოგი თამარ ედიბერიძე

ბავშვთა ნევროლოგმა თამარ ედიბერიძემ ბავშვის მარტივად ჩაძინებისთვის საჭირო წესების შესახებ ისაუბრა და მშობლებს საინტერესო რჩევები მისცა:

„ყოველდღიური აქტივობის ნებისმიერი დეტალი, ბანალური ფიზიკური თამაშებიდან დაწყებული ციფრული ტექნოლოგიებით დამთავრებული, რომელიც ძალიან გვიშლის ხელს ძილის ნორმალურ რეჟიმში, ყველაფერმა ამან შეიძლება გავლენა მოახდინოს რეჟიმის დარღვევაზე. სასურველია, რომ ძილის წინ შევზღუდოთ ფიზიკური აქტივობა, ველოსიპედი, ბურთით თამაში, დაჭერობანა, დამალობანა არ არის სასარგებლო ძილის წინ.“

თამარ ედიბერიძის თქმით, ძილის წინ ინტენსიური ემოციები საჭირო არ არის:

​ძილის წინ სასარგებლო არ არის ინტენსიური ემოციები. ახალი სათამაშო, სიურპრიზები მაქსიმალურად შევინახოთ გაღვიძებისთვის. დღის პირველ ნახევარში შეგვიძლია ყირაზე გადავიდეთ, მაქსიმალურად დავხარჯოთ ენერგია, მაგრამ დაძინებამდე ორი საათით ადრე ინტენსიურად ხტუნვა, სირბილი, ჰაერში აბურთავება არ უნდა იყოს. ჩავუწიოთ ტელევიზორის ხმას, ან გამოვრთოთ. პლასტელინი, ძერწვა, ხატვა, გაფერადება ძალიან სასარგებლო აქტივობებია ძილის წინ ჩასატარებლად. ვიწყებთ სიმბოლურად თოჯინების დაძინებას, სათამაშოების ალაგებას, იმიტომ, რომ დათუნიებმა უნდა დაიძინონ.“

„საწოლში რომ განვმარტოვდებით ბავშვთან ერთად, რომელიმე მისთვის ნაცნობი ზღაპარი, ერთი-ორი-სამიც შეიძლება. დაძინებამდე ლოგინში გატარებული დრო სასურველია, არ აღემატებოდეს ნახევარ საათს. 20 წუთი არის ყველაზე ოპტიმალური,“ - აღნიშნულ საკითხზე თამარ ედიბერიძემ ტელეკომპანია „პულსის“ ეთერში ისაუბრა.

წყარო: ​„პულსი“

წაიკითხეთ სრულად